› 選擇地區
三藩市
紐約
洛杉磯
其他美國地區
香港 台灣 北美
 
2020年02月14日

五星酒店外賣 - 左丁山

今日情人節,以往大酒店、高級食府生意做唔切,一雙雙情侶爭相訂位享受燭光晚餐,實行羅曼蒂克一番。點知今年武漢肺炎襲港,甚麼浪漫氣氛都沒有了,餐館無不叫苦連天。香港嘅酒店素來靠餐飲生意賺錢,而今酒店內餐廳空空如也,實不知如何捱落去,左丁山在1980年代中出任私募基金(那時候叫做直接投資公司)之投資董事,因董事會、大老闆喜歡投資酒店,故此接觸過起碼三十個酒店投資項目,從Arthur Andersen(執咗好耐)得到一個粗略酒店財務指標,一間酒店嘅房間總收入約佔總收入60%,餐飲佔35%,其他收入約5%(那些年有收電話費、長途電話費、電訊費等等,依家當然冇晒咯)。後來睇番酒店項目啲預測及實數,上述比例可微調為房租55%至50%,餐飲45%至50%,其他收入5%,但香港酒店收入比例更偏重於餐飲,當年閱讀富麗華酒店年報,發覺餐飲佔總收入約60%,遠高於其他亞洲區五星酒店,原因係香港人鍾意到大酒店擺酒,吃午飯晚飯及黃昏快樂時光,在曼谷耶加達馬尼拉好少見到本地人到酒店吃晚飯嘅。因此知道香港嘅酒店一向倚賴餐飲多過房租……一旦遊客不來,再有疫情打擊出外食飯意欲,如目前真實情況,酒店經營就慘過梁天來,苦過金葉菊。

上星期五收到老婆短訊:「星期日中午無謂出街飲茶嘞,你去中環金華買叉燒返嚟,一於在家吃一餐飯!」有冇搞錯呀,在辛苦日子,搵啲好嘢食得唔得?以解疫情憂鬱吖嘛。點知差不多同一時間,接到尖東帝苑酒店(Royal Garden)電郵,即日推出外賣服務,顧客可在酒店內四間餐廳點菜外賣,一齊叫埋越南河粉,莎巴天尼意大利飯,東來順甜品,中菜廳炒粉麵……只有四季菊日本菜不外賣。嘩,天助我也,急忙徵詢六舅七舅老襟意見,人人贊成,於是幾家人在七舅屋企開餐,向帝苑酒店落外賣訂單,網上訂菜仲有八折優惠㖭。酒店專人在星期日中午送到七舅家中,加埋第四代共二十人,吃個不亦樂乎,埋單每人(per head)約130~140元,夠晒抵,人人稱讚價廉物美!左丁山比較熟悉酒店經營方法,吃得開心之餘,暗地裏為酒店叫苦,以後點玩落去呀,真是難為了酒店總經理!好彩自己於80年代有份搞酒店投資時,形勢大好,遊客食客自動走埋嚟,但今日遇上時勢不濟,神仙難變,總經理識飛都冇用。

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載