› 選擇地區
三藩市
紐約
洛杉磯
其他美國地區
香港 台灣 北美
 
2020年02月15日

地盤口罩 - 左丁山

(資料圖片)

上星期在馬場聽到一個建築界人士講,某地盤新年後開工,曾發生工人在地盤暈倒兼嘔吐事件,嚇到管工及管理人員面青,即刻上報公司董事,董事飛咁快趕去地盤視察,以前呢啲事算係小事,扶起嘔吐工人,清潔一番便了事,但今時今日,冇人敢或肯行埋去清潔,而係你望我,我望你,待董事定奪。地盤人員就即時打電話叫白車,送工人入院,工人醒番,承認自己新年回鄉探親幾日,各人又立即彈開,此乃今日香港一景。好彩入院後檢查,只係普通感冒兼腸胃不適及睡眠不足啫。

後來晚上碰到入唔到馬場,因而嬲到震嘅地盤總管惡佬明,問佢:「地盤開工未?」惡佬明答:「梗係開咗啦,之不過每日為撲口罩煩,工程就一啲都唔煩。唔派口罩畀工人,開唔到工㗎。」口罩咯喎,全亞洲缺貨,買得到最平都要五蚊一個,二百人開工就要一千銀一日,係以前投標時冇考慮到嘅成本,真攞命,最弊嘅,就係有錢都未必買得到。

後來又問工程師C:「你地點買口罩?」工程C話:「費事話你知,總知我地採購部門有辦法,唔使工程人員去班貨,總之有印尼就用印尼貨,有泰國就用泰國貨,冇得揀擇嘅嘞。」點解唔延遲開工,學吓新世界嘅地盤呢,工程C話:「私人發展商自己話晒事,想點就點,我地承包政府工程,唔如期完工交貨就要罰錢,遲完工呢,每遲一日就罰幾十萬,所以我地點可以唔開工?」但政府話公務員返工可以延遲到2月23日噃?工程C冷笑:「我冇咁好命做公務員。」公務員唔使返工,地盤咪冇公務員巡查?一位地盤管工就對左丁山講:「仍然有政府人員嚟監察嘅,我地開工,佢地就一定要嚟,不過條氣唔係幾順咁啫。最過癮係佢地冇口罩要由我地公司畀埋,但我地照合約條款送上口罩之時,公務員就要問埋口罩生產來源證,生產品規格,等佢地申報上頭。坦白講,我地攞到口罩,已算夠運,邊度有問攞來源證及規格呀。公務員最初唔肯要,但後來又驚,死死氣戴上我地提供嘅口罩!」唔怪得做公務員逾30年嘅曾智華講公務員永遠程序第一,目標為次,唔識臨危應變,臨陣變通,香港特區政府領導人就係老公務員心態,武漢疫情打到埋身都不知如何應付,商界及平民唯有靠自己!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載