› 選擇地區
三藩市
紐約
洛杉磯
其他美國地區
香港 台灣 北美
 
2020年02月21日

為廁紙狂 - 左丁山

沙田陳太鍾意入馬場,凡有賽事,(星期日,星期三晚)佢就將湊孫事宜,交番畀仔女,自己去馬場過吓癮,亦係一個星期之中,唯一唔理會家事嘅時間;乜唔係啫,一家之主要湊孫,要管菲傭打理清潔,要掛住數屋企夠唔夠食米、廁紙、口罩、消毒酒精,都好緊張㗎,何況不時有同學朋友群組短訊講去邊度搶廁紙,好容易人都癲。

冇得入場之後,沙田陳太若有所失,佢又冇電話戶口,場外落注要靠阿仔及女婿,好唔方便。上星期六佢知道唔可以入場,但沙田會所凱旋廳仍然招呼會員飲茶,於是訂咗枱,點知打電話問清楚,唔可以揸車去,為之冇癮,陳太細佬細妹等人於是車陳太到尖沙咀九龍福臨門,車到門口,見到隔籬惠康有好多廁紙,陳太話:「不如入去執番兩條先。」細佬話:「飲完茶先啦。」陳太話:「你唔熟街市行情,有得買就買咗先。」於是六個人入惠康買咗12條廁紙(每人限購兩條)。

三點左右飲完茶,陳太話再買廁紙,畀出入不大方便嘅幼稚園老同學,點知賣晒咯,惠康廁紙即日售罄;今時今日,零售獨旺兩樣貨品:口罩與廁紙!左丁山知道後,話畀退休大公關聽,點知堂堂中環威水大公關,退休後有時間在家,太太叫佢去金鐘百佳買廁紙,連去三日(十時後)都買唔到,佢為之擰擰頭,住在圓方上蓋嘅老友對佢講:「圓方360有好多廁紙喎,應該買得到!」左丁山呢排泊車在圓方,朝朝經過萬寧(十時前),只見日日有幾十人在門口排隊等開門,其他名牌商店,就人影唔見一個。

九福經理對陳太細佬話:「晚飯好少客,好靜,歡迎外賣,唔送貨,請自取,星期日晚冇人訂位,可能提早收舖。」餐飲業真淒涼,左丁山上到陸羽,平時啲熟客唔見咗七八成,伙記話晚上靜過鬼,啲高檔客戶去晒邊呢?可能係去晒馬會,山光道會所聽講幾難訂到位,左丁山常到嘅沙田凱旋廳就午餐晚飯時間都坐滿人,好好生意,周末一位難求,大概係啲會員對馬會衛生情況有信心,唔出尖沙嘴中環名店就反而去山光道與沙田會所。

話說沙田陳太為人為到底,將自尖沙嘴買到嘅廁紙,送去老同學屋企,老同學歡喜到極,幾乎要同佢來一個熊抱,但在住宅大廈門口就畀一啲眼甘甘嘅師奶追問:「咁多廁紙,去邊度買㗎?」

陳太返到屋企,唞吓大氣,見到賽馬已去到第十場,電視上打出Jenny貼士,有4-7-11,4號開心大少係大熱門,陳太叫乖仔買7-11兩隻冷馬(皇龍大將、輝煌星),鴛鴦Q,哎吔,投注200元,咁就收番$3950,乖仔為之目瞪口呆!陳太話:「善有善報,我去尖沙嘴惠康買廁紙,明益老同學噃!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載