› 選擇地區
三藩市
紐約
洛杉磯
其他美國地區
香港 台灣 北美
 
2020年02月22日

鬥搶口罩供應 - 左丁山

(資料圖片)

校友A話有一位師弟想同左丁山食午飯,傾吓買馬、賽馬等事情,又好啫,碰巧呢排幾乎所有企業飯局聚會都取消晒,約見面容易好多,於是星期二就到陸羽二樓飲茶。本來以為講馬輕鬆吓,但在此時此刻,不談口罩無以言,一講開口罩,呢位師弟C原來有好多趣聞。

師弟C經營旅遊,但去年投身幫助政治理念同道中人競選區議員,結果係人都知啦,泛民大勝,控制17個區議會,贏就好威,現在要向市民選民交功課,考政績咯噃,現時最大政績就係要搵到口罩,由區議會在區內派發,但口罩從何而來?師弟C話:「算我係自由人啦,未結婚,有檔小生意,自己比較容易騰出空閒時間為校友區議員服務,憑旅遊網絡幾年來建立嘅一啲啲國際關係,咪周圍去撲口罩囉。我就嚟要去東南亞交收口罩幾十萬個,係透過幾個中間人幫手買到嘅,依家買大批口罩似係炒樓confirmed mortgage,一手轉二手轉三手,想話貨比三家,價低者得,真係想創你個心,一定買唔到。上星期一個歐洲客算有良心,收咗我哋一百萬港元定金,撻定原銀奉還,話嗰批口罩以更高價賣咗畀某國商人,真係手快有手慢冇。土耳其話有貨,但話明係散貨,冇盒,我唔敢買!」

咁辛苦去買口罩,就係以成本價交畀區議員,唯一酬勞就係自覺對香港社會有些少貢獻,橫掂政府買唔到口罩,不如市民自救。師弟C話希望好心有好報,佢一月之時,睇見餐飲業生意差,街舖租金勁減,想話租舖做酒吧,事先走去黃大仙求籤問一問,解籤女士同佢講:「大仙叫你2020年底先至好開舖,唔使咁急!」於是開舖計劃暫停,點知隨後武漢肺炎便衝出中國,搞到食肆紛紛結業,租金平極都冇人敢要,師弟C算執番身彩。但今年年初一在東京,收到區議員校友催促佢買口罩,但市面口罩已開始被搶購,冇法子買得到,點知佢無意中行過一條新宿風月場所小巷,見到一小藥房有口罩(遊客少到呢條小巷),於是入去問有冇限購,店員話:「賣晒畀你都得!」於是佢真係全部買晒,有萬幾個帶回香港,自言好運,於是到黃大仙送口罩畀解籤女士,解籤人好高興,感謝及時雨,話佢買唔到,「一個口罩戴足一個星期」,又到半山豪宅送口罩畀世伯母,闊太又係買唔到口罩啫!左丁山問:「點解唔見民建聯議員撲口罩嘅?」師弟話:「因次次要同祖國商人在東南亞搶貨,我地係去為香港市民鬥搶,民建聯中人愛國,唔會咁勇嘅!」

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載