› 選擇地區
三藩市
紐約
洛杉磯
其他美國地區
香港 台灣 北美
 
2020年03月26日

全華班贏打吡 - 左丁山

馬主陳國樑、練馬師呂健威、騎師何澤堯三位合作,以一隻自購新馬(PPG)「金鎗六十」贏得2020年度打吡,號稱係自香港有職業賽馬以來,第一次「全華班」香港人合作,贏到打吡,馬會甚為興奮,為此發新聞稿。左丁山唔識馬主,與何澤堯唔熟,不過與呂健威就相識多年,當年曾有一隻馬擺在呂健威馬房,那已是回歸之前嘅事咯。呂健威係紅牌騎師出身,當年光芒遠遜告東尼、羅國洲,勝在為人踏實,肯默默耕耘,退役後一直在馬房工作,做陳柏鴻副練,陳柏鴻失去牌照之後,馬會提拔呂健威升正,成為中型馬房,一向成績不大顯眼,單季贏馬在20至40場之間,點知今季踏入花甲之年,突然脫胎換骨,憑一隻PPG(呂健威自拍賣會買入)揚威,以呂兄作風,「金鎗六十」嘅買入價應該唔會好貴,肯定比洪祖杭嘅「佳龍駒」低價好多,洪祖杭買馬一向豪爽,不惜腰間錢,練馬師大摩食慣大茶飯,為田北俊買入「人民舞士」(PPG)都聽聞係一百萬澳元啦,「佳龍駒」係上一匹(2017年)四歲三冠王,買入價近八位數字,一啲都唔奇。

「金鎗六十」能夠今季七捷,贏埋打吡,真真正正係豆腐渣價錢,燒鵝髀味道,馬主練馬師都係鴻運當頭先至得。呂健威今季成績大躍進,目前以43場頭馬力逼姚本輝(45場頭馬),有機會爭做練馬師冠軍。做練馬師有時要靠一隻馬挽回聲望、名氣。譬如姚本輝曾經成績低落,陷淘汰邊緣,憑一隻馬王「蓮華生輝」大振聲威,成為前列練馬師,呂健威上季成績一般,今季有隻「金鎗六十」威震馬圈,令個馬房好似生晒,啲馬贏完又贏,唔到你唔服。

本地馬主凡用高價買入靚馬,都喜歡放入蔡約翰、大摩、告東尼馬房,上季羅富全異軍突起,有大馬主率馬來投,羅富全跟過蔡約翰。另一位前列練馬師沈集成係著名練馬師愛倫徒弟。呂健威在陳柏鴻馬房出頭,咁多年來可說全靠自己摸索,卒之到達殿堂,贏得打吡,可喜可喜也。下一個挑戰,當然係保持「金鎗六十」健康正常,狀態十足,下一季再可以贏得國際賽香港金盃,成為不朽名駒。過往打吡冠軍(4歲)往往在下一季踏入5歲之後,就開始回落,狀態走下坡,廣大馬迷當然希望「金鎗六十」能夠贏多一兩季,衝出香港,到日本/杜拜為香港馬爭光。何澤堯係馬會培訓出嚟嘅出色騎師,季季有進步,目前仍未到莫雷拉、潘頓級數,希望佢繼續努力,以告東尼為學習對象,成為世界級騎師!

左丁山
電郵 :
mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載