› 選擇地區
三藩市
紐約
洛杉磯
其他美國地區
香港 台灣 北美
 
2019年03月16日

【西遊記】沒有愛情喜劇的年代 - 方俊傑

想睇《非凡浪漫》?約女友一齊睇手機啦,套戲喺香港由Netflix發行。劇照

年代太遠的都不說了:三十年前,即是我升中學開始有性衝動時,至少有Meg Ryan做愛情片天后,《90男歡女愛》(When Harry Met Sally)、《緣份的天空》(Sleepless in Seattle)的好,是好到害Meg Ryan拍不到其他種類的電影。到我真真正正開始交朋結友的九十年代,輪到Sandra Bullock接力,由《暗戀你暗戀妳》(While You Were Sleeping)拍到《求婚的惡魔》(The Proposal),中間還出現過Drew Barrymore、Kate Hudson等,專出愛情喜劇的女星。近十年呢?愛情喜劇跟甜心女星像絕種。不要跟我說《我的超豪男友》(Crazy Rich Asians)是愛情喜劇。

成功的喜劇是有,多數歌頌友情。例如《醉爆伴郎團》(The Hangover),例如《辣妹合唱團》(Pitch Perfect)。《辣妹合唱團》捧出了扮演Fat Amy的Rebel Wilson,難得有機會獨當一面,不是說之後跟Anne Hathaway合作的《圓美大盜》(The Hustle),是指已經上畫的《非凡浪漫》(Isn't It Romantic)。電影海報得Fat Amy大大塊面,咁都唔算獨當一面的話,唔知點先算。擺明車馬浪漫喜劇啩,一個肥妹,一次意外後,去了浪漫電影的世界,紐約不再烏煙瘴氣反而處處粉色,住的劏房變成豪宅,明明打份悶工,突然被推舉為星級建築師。最重要是,有一個又靚仔又大隻又好人品又有錢的男人個個不愛,只愛自己。連電影開場也品題過《風月俏佳人》(Pretty Woman),今次仲唔復古?

變成勵志片或ETV

當然不會啦。灰姑娘、白雪公主是現今社會最仇視的產物。Keira Knightley不理自己都會接迪士尼的片約,講明無法容許女兒接觸迪士尼童話,因為,灰姑娘與白雪公主都要倚賴王子打救,無用。做女人應該自強應該自愛,怎可以似睡公主瞓低等運到?果然,《非凡浪漫》講到Fat Amy其實只垂涎男神肉體,一旦發現活在愛情喜劇的世界,有愛無性,立即把夢中情人一手推開,諗諗吓,連情投意合的公司同事也可以放棄,因為做人其實甚麼人也可以不愛,只有愛自己最最最重要。又來一齣教育電視。沒辦法,個個道德怪上身的時候,做妓女的Julia Roberts跟億萬富翁Richard Gere由生意貿易玩出真感情,從紅燈區跳到比華利山,不是發夢,是罪行,是逆女權。難怪愛情喜劇絕迹江湖,全部變成勵志片。試幻想,如果你帶位女性朋友入戲院看《非凡浪漫》,以為只不過輕輕鬆鬆笑一笑,看到結局,Fat Amy居然教你女朋友自愛,男女私情全部等閒事,你話何等掃興?唔係話唔啱,但唔使一星期七日一日廿四小時也活在學校一樣吧,尤其今日的校長會辱罵到教師自殺。

開始明白,為何《格雷的五十道色戒》(Fifty Shades of Grey)難睇到爆炸,第三集的全球票房仍然高達三億六千萬美金,根本是獨市生意。乜話?你仍然想入場看《非凡浪漫》,不過搵極都搵唔到有戲院上畫?Sorry,上畫是美國的事,在香港,由Netflix發行。想約女朋友一齊觀看的話,可以約她上你家看手機。大前提是你有一間屬於自己的房,間房,又夠位擺到一張床。不過,其實,有張床,又點啫?

撰文:方俊傑
觀塘長大,壹仔打滾,偏愛西片、西劇、中日韓美女。利物浦悲慘球迷,非西人一個。facebook : 方俊傑

方俊傑

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載