› 選擇地區
三藩市
紐約
洛杉磯
其他美國地區
香港 台灣 北美
 
2014年06月18日

客客氣氣 - 曾志豪

人不要臉,天下無敵;人有多大膽,大話便有多大膽。當我聽到梁愛詩說,回歸初的保證和今天的白皮書為何說法如此不同,答案竟然是「識朋友開頭都係客客氣氣」,我便明白她當日為何會放生胡仙了,因為她應該是把胡仙當成朋友了,對她客客氣氣,而對其他異見人士,當然就唔同你客氣。
梁愛詩畢竟是前任律政司長,她心中難道真的無半點法律觀念,她真的不知道法律的意思,便是「白紙黑字」,避免口同鼻拗嗎?如果那所謂「創造性」的一國兩制的,原來只是和街邊sell你買保險產品的經紀一樣,簽約前天花亂墜乜都得,簽約後去如黃鶴,則你等於話鄧小平其實是騙子。
是否以後市民俾人呃,貨不對辦,有前無後,投訴至警察消委會,對方都會答:係咁㗎啦,未俾錢前梗係當你朋友,客客氣氣,俾咗錢,識得你耐咗,咪講多少少俾你聽,個窗台其實係大過你間睡房㗎。
張炳良也不要再對高鐵延誤驚訝了,因為港鐵的做法不叫隱瞞,只是港鐵當政府係朋友,開頭梗係客客氣氣,識耐咗先講得深入啲,其實我哋係無可能準時交到貨。
香港是否從此要變成不守承諾,不講規矩制度的客客氣氣城市?如果我們能接受這些左派對違反一國兩制的解釋,則政府還需要寫施政報告,交代政策理念嗎?反正寫了也可以改掉,反正開頭只是客客氣氣,反正你一認真便輸了。
其實梁愛詩的確講了真話,國情的確是以欺瞞為主流。毛澤東曾鼓勵知識份子大鳴大放,給予黨真誠意見,結果最後變成引蛇出洞的陽謀,用今天的話來說,毛澤東開頭當你係朋友,客客氣氣,識耐咗咪話你知,其實我係會秋後算帳㗎。


識睇 一定睇蘋果嘅足動世盃:
http://worldcup2014.appledaily.com

曾志豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載