› 選擇地區
三藩市
紐約
洛杉磯
其他美國地區
香港 台灣 北美
 
2014年08月02日

武松打老虎的原因 - 曾志豪

水滸傳裏,武松過景陽崗打虎,為民除害,從此百姓上山倍安心,難怪武松被稱為「打虎英雄」。
但如果你訪問武松,可能會得出另類答案。
記者:武生,點解你會咁為人民着想,上山打虎?
武松:你無睇小說㗎咩,我係飲大咗幾杯先會上咗山,仲要咁唔好彩遇到隻老虎咋。
記者:你嘅意思係話,你唔係為咗幫人民除害而打虎?
武松:哥哥仔,我路過景陽崗咋,我係路人甲,我是來打醬油的,無諗過要打虎。
記者:咁點解你要上山打老虎呢?
武松:是咁的,我要過路,但有隻攔路虎阻住,咁一係就我唔過景陽崗運路行,一係就我打死隻老虎向前行。我趕時間,只能講聲唔好意思,攔路虎都要死。
記者:所以,你之所以打大老虎,係因為,隻大老虎阻住你條路?
武松:當然啦,隻老虎唔止阻住我行路,仲有傷害我嘅意圖啊﹗隻老虎,想暗殺我啊!
記者:所以唔係你死就係佢亡,你都係出於自衞先會打老虎?
武松:梗係啦,人無傷虎心,虎有傷人意喎。
記者:會唔會係一山不能藏二虎呢?
武松:今次打老虎,說明無論你體型幾大,跑得幾快,爪牙幾鋒利,只要你威脅到我嘅安全,我絕不姑息,將你打落嚟﹗
記者:你打虎嘅威風大家都知,但點解山間會出現咁大隻食人為患的老虎呢?
武松:主要都係隻老虎思想滑坡、道德腐敗、貪得無厭……
記者:老虎天生要食肉,問題係,點解呢座山會孕育出咁大隻老虎?由小老虎變大老虎,係咪呢座山嘅環境唔係幾健康?係咪啲官衙、村長姑息養奸、無好好巡山,任由山間匿藏咗咁大隻老虎呢?
武松:你的發問已被屏蔽,多謝。

曾志豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載