› 選擇地區
三藩市
紐約
洛杉磯
其他美國地區
香港 台灣 北美
 
2017年06月14日

道德高地扮晒嘢龍虎榜 - 曾志豪

(設計圖片)

如果香港有「道德高地扮晒嘢龍虎榜」的話,以下幾句說話都應該名列前茅。
榜內的說話,聽的人一定覺得「嘩有無咁假㗎扮晒嘢」。
「食呢啲係破壞環境嘅生態平衡㗎」。
如果你食日本嘢,想點一板的海膽,對方卻告訴你,今時今日,過份濫捕海膽,已經破壞海洋生態平衡,影響珊瑚礁的生長,你會點反應?香港人應該會說「但係今日海膽有八折喎」。
你無錯,對方亦無講大話,濫捕海膽的確破壞海洋生態,就看你覺得discount和珊瑚礁邊樣重要。
「你咁樣係侵權㗎喎」。
當你找到一個看足球/籃球的直播網址還要開心些牙,對方卻勸你不要收看,因為這是非法侵權的行為,你會覺得這個人有病。
然後你會為自己的行為說出堂而皇之的理由:「體育是世界語言不應被商業版權壟斷為一小撮人觀看的專利」,簡單啲,你只係唔想俾錢俾月費矣。
「成日出新電話其實製造緊電子垃圾好浪費」。
當你望着那個最新型號其實和以往機種外形相似的電話口水長流時,對方如是說。成熟的香港人知道如何回應:「如果我哋唔買新機呢個地球嘅經濟已經玩完。」但同時你也知道,地球的確遲早玩完。
「好想掛八號波放假嘅打工仔係咪太自私呢?有無諗過受影響的人呢?」
毋須解釋,全港都明白。如果當你在辦公室看着八號颱風訊號,然後興奮的打電話約「阿堅阿強同埋阿祥」今晚開枱,對方如此批評你,你肯肯定覺得對方有病。
香港打工仔的確很愛打風,那幾乎是我們唯一的寄託和娛樂。這句話應該是最讓人覺得「扮晒嘢」的冠軍,因為你只是關注眼前打工仔的利益,卻不夠遠去關心受影響的災民。
究竟是講的人扮晒嘢,還是聽的人太膚淺唔抵得,自己心照。

曾志豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載