› 選擇地區
三藩市
紐約
洛杉磯
其他美國地區
香港 台灣 北美
 
2018年01月27日

我唔接受我係一個冇身材嘅……人 - 李碧華

狐狸精:
你做乜勾我老公?
你個賤人趁我好忙好忙,飛嚟飛去炒樓,唔喺香港,冇為意?時候,勾──我──老──公!
我哋新婚先至一年,而你個賤人,枉我當你係好姊妹,有今生冇來世,咁都落得手?我同佢朝夕隔住暗門相對,又響僭建地牢唱K睇戲,我honey對我一條心──係你!乘虛而入,仲留低煙頭同埋個紅bra,證據確鑿,我同你一齊買一人一個,點知你送埋畀我,真係眼寃!囂張得你吖,我剪爛咗索性燒咗佢,都難洩我心頭之恨!
阿娥,你犯咗全天下狐狸精都會犯嘅錯,個個唔勾去勾好姊妹二佬?你仲同我honey恥笑我冇身材──我唔接受我係一個冇身材嘅……人!我其實已經有認可人士去睇過晒同埋量度過三圍,我係G奶、G臀,加G腰:36、36、36。豐滿圓潤,貫徹始終,腰纏萬貫,穩如泰山,有恃無恐。點會冇身材?只係冇曲線。身為婦女界驅狐團嘅公職王,專門對付你呢亭,樓都冇一層,就算恆指升到4萬點,都貴唔起嘅賤人!呢D唔係一個人嘅事,係一個制度嘅事──你咁做,對得住黨同國家咩?做人最緊要誠信同知碇,睇路呀!
大婆驊

李碧華

精挑細味 籽想好食,即like「籽想好食」FB專頁!
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載