› 選擇地區
三藩市
紐約
洛杉磯
其他美國地區
香港 台灣 北美
 
2019年07月06日

鼠王芬,我哋撐你! - 李碧華

鼠王芬老師:

你好呀。我哋唔係你嘅學生──冇咁好「福份」。不過我哋一向欽敬德高望重嘅前輩。聯名寫信畀你,除咗「聽聞」你係貌美如花,學識淵博,正直公義,愛國愛黨(唔駛愛港㗎)嘅長者──呀,係學者,仲好熱心公益。

你竟然可以憑議員身份,千辛萬苦咁搵到百幾個建制法律界人士聯署,嚴厲譴責「暴徒」破壞香港立法會大樓,仲響外面舉行記招,真係「行公義,好憐憫」嘅基督徒,我哋雖然冇辦法目睹,但你嘅氣場好勁!完全襯得起你嘅大號。

你係人中之鼠,鼠中之王,地位幾咁尊貴。點知有班得閒得滯嘅市民,竟然一味追住你嚟鬧,又質疑你嘅品格同信仰,憑乜資格做香港人嘅議員?你避入中信大廈,又畀人窒話係放催淚彈嘅地方……估計令你花容失色。

期間你想截的士走人,個司機竟然──拒──載!須知你係「人見人愛,車見車載」嘅佳麗,點會淪為「人見人厭,車見車嫌」或者「人見人妖,車見車藐」嘅過街老鼠呢?佢真係有眼無珠。鼠老師工作勤奮又有兼職,按壓拿揑手勢好,老細舒服打賞又多,所以仰慕之餘更一齊撐你!加油!

大灣區盲人腳底按摩中心全體員工敬上

李碧華
電郵 :
mcwriter@appledaily.com

精挑細味 籽想好食,即like「籽想好食」FB專頁!
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載