› 選擇地區
三藩市
紐約
洛杉磯
其他美國地區
香港 台灣 北美
 
2014年10月05日

預咗畀人非禮 - 邁克

「出得嚟示威,就預咗畀人非禮」,媽媽咪呀,這究竟是什麼邏輯?馬上想起的,是早前印度那單令人髮指的姦殺案,受害人在公共交通工具被擄,天良喪盡的暴徒施虐時,恐怕也用了一模一樣的口吻,理直氣壯為自己的惡行開脫:鬼叫佢有私家車唔坐,出得嚟搭巴士,就預咗畀人輪姦。餘此類推,入得電梯上上落落,就預咗遲早困𨋢,打得開電腦互聯,就預咗撞見黑客,去得餐館飲茶食飯,就預咗滿嘴地溝油,搭得飛機呢度去嗰度去,就預咗恐佈份子襲擊,行得百貨公司掃貨,就預咗踩到地上的來歷不明液體,抱得意中人上床,就預咗患愛滋,買得叉燒包,就預咗啲餡係人肉,幫襯得迪士尼樂園,就預咗過山車會出軌……世界如果這麼悲慘,這麼缺乏基本生活品質保證,為什麼我們不集體移民月球,遠離徹底墮落的人類文明?
把一切歸咎為別人「自己攞嚟衰」,不但是最低賤的推卸責任方式,而且擺出一副打爛仔交格局,等於到處告訴大家他是不可理喻的蠻族,生人勿近有咁遠避咁遠。關於佔中,我一直覺得沒有資格發言,因為懂得的太皮毛太浮面,知啲唔知啲,所以連日來躲在時代曲象牙塔風花雪月,把隔江猶唱後庭花進行到底。然而和平示威者遭惡漢橫衝直撞拳打腳踢,觸動的神經線就很原始,反應近乎本能。事發地點周街差佬,早兩日使用胡椒噴霧勇不可當,怎麼來到市民真正需要受保護的時刻,卻又個個忽然手軟?哎呀,鄧伯伯的金句原來有弦外之音哩,「不管黑貓白貓,能捉到老鼠的就是好貓」,今時今日總算聽明白了吧?

邁克

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載