› 選擇地區
三藩市
紐約
洛杉磯
其他美國地區
香港 台灣 北美
 
2019年06月12日

即將被腳痛? - 邁克

美國CNN記者不專心工作,光天化日睇相佬上身,合指一算批林鄭時日無多,港胞聽見無不笑到甩牙骹,唔知啋過佢好抑或承佢貴言好。這些讀過幾期《經濟學人》的鬼佬,只會得霧裏看花,中國國情一竅不通就來指口篤鼻,實在乞人憎,普通話識少少叻唔切,人家明明字正腔圓講「送中」,他有本事聽成大吉利市的「送終」,自作聰明把花圈送到殯儀館去了,你說該不該打屁股?咪玩啦哥哥,三分顏色上大紅的特首,點可能即將被腳痛,君不見蛇頭鼠眼填滿傲慢與偏見,一副「侍兒扶起嬌無力,始是新承恩澤時」的疏乎格局,臉皮又厚耳仔又聾,紮穩馬步長命工夫長命做,你估似得文翠珊咁化學咩,不會無端端夭折的。我一個骨灰級藍絲朋友,就盛讚她英明神武,上任以來好事多為,不但董伯伯煲呔曾望塵莫及,甚至轉行做廣告計數佬的梁振英都差兩皮,如果這樣也不能官運亨通,那就白白辜負當初報夢召她出山的上帝一番苦心了。

自幼家教森嚴的好人家子弟,被訓練成擔屎唔偷食的奉公守法公民,除了小心翼翼自省其身,還以為全世界都和他們一樣公正不阿言出必行,漸漸變得非常呆板古肅,目擊百萬人上街反惡法高呼林鄭下台,面上不禁流露迷惑神色,咦了一聲追問:「嗰陣佢咪講過,若然一旦群眾集體表示不滿,會欣然辭工嘅,點解仲未將諾言付諸行動?」哈哈哈,唔係啩,政客講嘢你都信,戇唔戇X啲呀?佢夠口口聲聲話唔介意做市民出氣筒啦,你試吓走過去摑佢兩巴睇吓有乜後果吖嗱。又唔係你投票選出嚟嘅,你以為佢欠咗你?

邁克
電郵 :
heartsociety2@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載