› 選擇地區
三藩市
紐約
洛杉磯
其他美國地區
香港 台灣 北美
 
2019年07月01日

死雞撐飯蓋 - 邁克

看過兩場唐滌生粵劇的林鄭,果然學到嘢,仙姐在《帝女花》被靚次伯追斬,倒地哀鳴「父王父王,一劍唔死得㗎」,搬到禮賓府裝飾了非富則貴的閉門派對,面壁思過的結果不是大徹大悟,而是鑽進牛角尖繼續扮鴕鳥,笑住宣稱「好多人以為我死咗,但我唔會死得去」。哎呀陰功豬,日日政治自殺都死唔去,呢個女人條命點解咁苦,看來拒絕面對市民訴求之餘盲目撐警,不外將「望你再加一劍,免我痛成咁慘」付諸行動,期待煩不勝煩的阿爺吐出那句「女啊望你撐開生死路,我送你入去鬼門關」,行得快好世界,天堂個位被取消無所謂,收拾細軟跑到倫敦邀請前上司個老婆飲下午茶是正經。應約的彭太那天心情如果大好,可能暫時收起修煉多年的優雅,以比較直接的語境訓導耳仔撞聾的前朝小梅香:「阿妹,你又係嘅,我夫君慷慨施贈錦囊,無非想救你出生天啫,你唔聽從晒都好應該接納一半吖,呃,嗰陣晌香港,啲人成日講『死雞撐飯蓋』,我哋鬼婆十指不沾陽春水,從來唔煮飯,實在拼湊不出畫面,家陣明嘞,原來係形容你呢種人。」

肥彭兩大建議,一是正式宣佈kill bill以平民怨,二是委派獨立小組調查警方濫用武力以息民怒,「唔係好似去獵兔咁用橡膠子彈射人,唔係瞄準示威者塊面近距離噴胡椒噴霧,唔係用警棍毒打跌咗晌路面嘅佢哋」,字字珠璣語重心長,但凡有少少良知,都會虛心受教,誰不知扶不上壁的爛泥堅持傲慢,冷冷回敬「睬你都傻」。好呀,又睇吓佢個周駙馬會唔會「借一杯附薦鳳台上」,陪佢含淚飲砒霜吖嗱。

邁克
電郵 :
heartsociety2@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載