› 選擇地區
三藩市
紐約
洛杉磯
其他美國地區
香港 台灣 北美
 
2019年07月03日

十個討厭日本的理由 - 鄧達智

鄧達智拍攝

1,怪你過份美麗

點解要咁靚?

太靚既係罪、又係病,好心你就醜樣啲啦……話口未完,口痕友A即彈:靚!靚!靚!日本人識扮嘢作狀之嘛,有冇去過京都火車站南端近鴨川一圈,當然唔係望河貴價地段,跟東山、高爾夫球場地段根本天國與地獄兩個世界,平民區簡陋到呢!

又補充:又真係好乞人憎,窮則變、變則亂,又髒又亂就好啦,人窮你又窮,點解窮得咁乾淨,街上幾乎沒見香港至平常風景;隨地棄扔膠袋與紙巾。

靚到咁雕琢,靚到咁細膩,靚勻全世界就明顯虛假嘞!

2,假得嚟好真

B 搶答:日本人對外人、尤其不會建立埋身關係的遊客,永遠客客氣氣地疏離,但對自己人卻更冷淡無情兼有聲夾無聲公眾批判,好些日本朋友久居香港或環境略差東南亞,寧願不回去呢,所以精叻嘅中國人就不會移民日本,去玩、去消費就算!

有需要咁假咩?例如機場出境,先將手提行李過機然後過移民局辦出境;冒失鬼忘記取回手機,個官員竟然用膠籮盛着,奔跑低聲追問:誰的手機?誰人遺漏的手機?

更是日本人例牌,公眾場所不揚聲,低聲下氣到呢。睇官員滿頭大汗,抑壓到……其實呢,香港官員未必似其他地區官員偷咗個遺留手機,就放在那裏等失機者自覺回來拿取,得失機主自負,與人無尤親家兩免就最好!

3,引誘華人做漢奸撩台獨港獨

有一種病叫「思日病」,即是廣府人口中:慈母多敗兒!

想你死、想你賤,對你千依百順,乜都俾至好過你,牽住你永遠不離不棄,簡直另類「精神殖民」。日本「大東亞共榮圈」之夢被美國打殘,中國東北還原不了滿州國,韓國獨立,台灣交還中華民國;大帝國主義無法添加。好,使出一招慈母毒計;靚環境、靚外貌、靚設計、靚食材、鞠躬鞠到你暈嘅禮數周周以靚出發待人接物、寡言少語扮禪營造氣氛……總之多到數唔晒嘅糖衣文化毒藥鴉片,愚弄鄰國蠢民,收歸精神國有,以精神及情緒殖民之,甚至衍生台獨、港獨,這個日本真正討厭到極!

討厭日本何止十個理由?一百個嫌少,點講都講唔晒;今個星期四晚十一點,香港電台第一台「講東講西」,一齊講講十個、百個討厭日本的理由。

鄧達智
電郵 :
chiuou@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載