› 選擇地區
三藩市
紐約
洛杉磯
其他美國地區
香港 台灣 北美
 
2016年05月18日

「親切問候」張德江 - 馮睎乾

滿清官員,英文叫Mandarin,所以張德江來港,就是「香港M到」。M到會影響日常生活,所以地盤停工,巴士改道,香港人暴躁,都順理成章。最估佢唔到,是城管也在激素異常分泌的影響下,拉大隊守荒山野嶺。儍豬豬,守住一座山,仲有千千萬萬座山,要張德江睇唔到嘢,除咗戒嚴之外,仲可以插盲佢㗎嘛。
其實香港人出名善忘,咩直幡?咩「我要真普選」?早就拋諸腦後。城管偏要勞師動眾紮營駐兵,彷彿魔教召開武林大會,廣發英雄帖,各路人馬自然從四面八方圍攻光明頂。facebook有「我的這一天」這窩心功能,讓慣性失憶的你回顧當年今日;想不到現實世界也有,由特區城管執行,負責勾起市民的集體回憶,令人滾動。
今天約朋友B吃午飯,他甫坐下就破口大罵:「嗰條粉腸嚟咩香港,正狗官!」我以為有不共戴天之仇,就問:「係咪佢當年隱瞞疫情,害死你邊位親人?」B立即連珠炮發:「如果佢害死我親人,我仲會咁冷靜?股市五窮六絕,我呢輪梗係put啦,明明氣勢如虹,點知條契弟失驚無神落嚟,啲好友乘機炒佢送大禮,咪又係咩深港通嗰啲狗屎垃圾囉,咁就搞到呢兩日個市忽上忽落,仲chok過宋仲基,我俾人夾咗幾百點呀。我唔理,總之呢餐你請!」──忘記介紹,B是金融才俊,自稱「獨沽求利」。
我向來認為面對妖魔鬼怪,最緊要淡定,所以對B說:「知唔知見到污糟嘢應該點?《幽明錄》記載阮德如喺茅廁撞鬼,隻嘢成身黑色好恐怖,正常人見到實好大反應。但阮德如只係若無其事咁講咗句:『人言鬼可憎,果然。』隻鬼一聽就好羞愧,幾乎想say sorry,即刻自己消失。官都係一樣啫,你唔俾反應,佢就惡唔出樣,個市變宋仲基,唔係因為張德江,係你。為支爆盡一分力,繼續沽啦。」
官也好,鬼也好,有時「無視」才是最佳態度。

馮睎乾

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載