› 選擇地區
三藩市
紐約
洛杉磯
其他美國地區
香港 台灣 北美
 
2016年12月13日

林鄭同葉劉,揀邊個都嘔 - 馮睎乾

甲:「林鄭同葉劉,如果真係有得揀,而且事必要你揀,你會點揀?」
乙:「×,林鄭囉,佢個樣冇咁衰,講嘢又唔會一嚿嚿。你呢?」
甲:「葉劉,因為只有葉劉先可以團結香港人。佢讀幼稚園、小學嗰陣,老師已經喺成績表批佢『有上進心、服從性強』──」
乙:「嘩佢讀邊間學校,啲老師識睇相嘅?上進即係好勝,服從即係奴性,分明係個好勝嘅奴才啦,仲唔係689翻版?」
甲:「梗唔係啦,拎葉劉同689比,簡直侮辱咗佢。689出盡洪荒之力播獨,搞咗幾年,港獨都係得嗰小雞三四隻,咁做嘢法,食屎啦你!但老董年代嘅葉劉就唔同嘞,佢一吹雞,即刻號召五十萬人上街,咩階層界別嘅人都有,環顧當今香港,仲有邊個可以令市民咁齊心呢?If not RIP, who?林鄭口才好,當然可以呃到一啲人,但呃到一啲人,呃唔到全世界,咁結果點呢?香港咪繼續撕裂囉。你睇葉劉,正所謂人神共憤,呃唔到人,又呃唔到車公。如果佢做特首,香港呢鑊仲唔萬眾一心同佢玩鋪勁嘅?所以話,識揀一定揀葉劉。」
乙:「聽你咁講嘢,似乎係個有深度嘅人,不過王爾德真係講過,『只有膚淺嘅人先至唔睇樣』噃。政府推惡法,最緊要係夠票,我哋橫又死、掂又死㗎啦。林鄭口才好啲,至少呃到吓人,都係一種實力,點都好過睇住葉劉話『你唔守規矩,又冇禮貌,我唔會再答你』,然後乜×惡法都夠票過晒啩?你諗諗,兩個結果都一樣,但邊樣嬲啲先?畀叻人呃,我願賭服輸;畀蠢人騎,就條氣chok住。偽君子點都好過真小人,因為偽君子仲有羞恥之心吖嘛!」
孔子同耶穌都講過:「有得揀,你至係老闆;冇得揀,仲唔係旦散?」要在林鄭和葉劉之間二擇其一?以甲、乙兩條旦散嘅智慧嚟講,當然無法子睇得透。

馮睎乾

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載