› 選擇地區
三藩市
紐約
洛杉磯
其他美國地區
香港 台灣 北美
 
2017年12月06日

我的正義朋友 - 馮睎乾

呂麗瑤自揭性侵,實情如何不得而知,我沒興趣當偵探。但我有位朋友,不知哪來的正義感,日夜為教練呼冤,直指呂麗瑤說謊。問他怎知道,他說:「佢好多疑點,唔報警,憑一面之詞,點信呀?分明講大話。」我說:「你唔信太陽東邊升起,係咪證明到太陽唔會喺東邊升起?你唔信佢,冇問題,但你只可以講『我懷疑佢講大話』,唔可以單單因為唔信,就直接話『佢講大話』,除非你有佢講大話嘅證據。」他反駁:「邊個話冇?Facebook流傳好多張相,拍到佢近年同教練開心合照,同佢講嘅故事好矛盾囉。」我答:「咁啲相係咪證明到性侵係假?」他開始不耐煩:「係證明唔到有冇性侵,但證明到佢唔可信。」我笑:「乜你唔係一開始就唔信嘅咩?多咗堆相,原來只係令你更加唔信,你覺得好大發現?」
這時候,友人義憤填膺:「X你,佢唔報警,咁教練就算畀佢屈,都冇得自辯啦。」我說:「唔係喎,啲相片咁多人buy,教練做咩唔用嚟反擊?好嘞,就當佢屈教練,但教練又唔出聲,你點解皇帝唔急太監急?」他說:「仆你個街,報警係公民責任呀。就當條女講真,唔報警咪即係放生個色狼囉!」我點頭:「你終於講出重點。其實好多女仔畀人非禮後,都唔敢報警,甚至唔出聲,呢班女仔係咪全部要畀你審?你係咪覺得放生色狼,仲嚴重過做色狼?」他終於爆seed:「佢破壞法治呀依家!」我當場嚇一跳:「乜你以前唔係話,法治係用嚟制約政府,只有政府先破壞到法治嘅咩?就當呂麗瑤真係破壞法治,你又擔心乜呢?法治已死,但會無限復活,你將來有咩需要,都仲可以再高呼『法治已死』㗎。」
我講第N次:呂麗瑤報警是最好的,這樣做較符合公眾利益。我反對的,是嘩眾取寵的KOL用低賤語言,加鹽加醋奚落一個可能的受害人。最後我跟朋友說:如果真心關懷教練,勿再傳閱他的照片了,對自己不知道的事,就盡量保持緘默吧。

馮睎乾
電郵 :
philomusus@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載