› 選擇地區
三藩市
紐約
洛杉磯
其他美國地區
香港 台灣 北美
 
2018年01月31日

周星馳答乜Q? - 馮睎乾

《有線新聞》截圖

五年前,周星馳獲欽點為廣東省政協委員,事先毫不知情,但國家有任務交畀你,阿漆當然不能推。可他開會常遲到早退,甚至缺席,理由跟鄭若驊一樣,也是「忙」。「從政」五年未見提案,毫無貢獻,備受媒體批評,大家以為他仕途黯淡,前程似咁,但共產黨畀你估到,咁佢就唔係共產黨啦。國家領導可能覺得「就算一張廁紙,一條底褲,都有佢本身嘅用處」,所以阿漆今年又無厘頭連任了。
日前星爺罕有地露面,出席廣東省政協會議閉幕大會,滿頭灰白髮,戴一副粗黑框眼鏡,身穿西裝,是見老了,但史提芬周魅力依然,同場政協都變成小粉絲,紛紛跟他合照。他接受記者訪問,有人問他大陸發展機會如何,星爺以一貫嚴肅的神情、審慎的口吻作答,以下是逐字紀錄:「內地的而且確有好多發展機會,咁……呀……我自己覺得,即係如果喺內地呢,即係對我嚟講,即係我,喺創意方面係,嗰個發揮嘅空間就大咗好多。」語畢,記者似乎不懂反應(我真想看看她表情),大概勢估唔到,居然有人會說內地創作有更大發揮空間,憑此一句,已知道星爺寶刀未老──估你唔到吖嘛。
報導出街,媒體大字標題,皆作「周星馳:內地有更大發揮空間」,且強調「廣東省政協」身份,網民多數負評,我覺得有點冤枉了他。正如我第一段所指,他已盡晒力hea做,博唔撈。但精通讀心術的黨,早已洞悉他的詭計,非但不DQ你,還要罰你連任,問你怕未?他說創意空間更大,其實沒半分虛言,因為他一而再強調,「即係對我嚟講,即係我」。大陸電影審查的潛規則,不是有一條說「建國以後不能有妖魔鬼怪」嗎?但你不妨看看《美人魚》,竟然可以「犯禁」,可見星爺地位超然。別人笑他太瘋癲,我笑他人看不穿,當大家只留意「更大發揮空間」這sound bite時,我聽得最清楚的卻是「對我嚟講」。

馮睎乾
電郵 :
philomusus@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載