› 選擇地區
三藩市
紐約
洛杉磯
其他美國地區
香港 台灣 北美
 
2019年07月04日

反對維修立法會 - 馮睎乾

藍絲長輩說:「嘩,整返好立法會,要六千萬喎,無端端暴動,真係搞亂香港!」我馬上警告他:「咩暴動?你咪亂講。政府如果定性為『暴動』,保險就唔賠。你有冇交稅呀?你唔想浪費公帑,今日就應該表態,阻止政府話係暴動。」

長輩:「用我啲錢埋單,咁唔得,公眾利益嚟嘛,我唔同意係暴動!不過班人破壞完立法會,又要其他人埋單,係嘥錢喎!」我說:「嗱,呢句我就撐你嘞。維修立法會真係嘥錢,所以我哋要反對維修。」

長輩有點錯愕,我解釋:「你成日話反對派搞亂香港,建制派人頭豬腦,咁做乜要整返立法會?整咁靚,又唔係畀你用!立法會是是但但,有枱有凳,有水有電,有個掣畀啲『撳掣派』撳吓咪得囉,使乜六千萬咁奢華呀?如果班議員唔能夠喺有塗鴉嘅環境下工作,佢可以辭職。

「再講,依家立法會有咩問題?仲靚過舊時啦!我睇新聞,見啲示威者擺咗林鄭月娥、鄭若驊、盧偉聰同李家超四張黑白大頭相入去,成個氣氛即刻莊嚴晒,有種靈堂嘅穆肅,好過平時吵吵鬧鬧,係咪先?我反對暴力,但美學上講,依家立法會嘅室內設計,反映到時代精神,莊嚴得嚟又有幾分俏皮,合乎年輕人嘅口味,林鄭話要同年青人同行,機會嚟嘞!政府與其花大筆公帑去還原立法會,不如諮詢吓市民,如果主流民意係支持依家呢個立法會形象,咪唔使嘥錢整囉!」

長輩:「咁又係……但萬一啲議員唔肯呢,咁立法會咪冇人做嘢?」我說:「冇人做嘢咪仲慳錢!立法會批錢起高鐵,超支194億,起港珠澳大橋,超支166億,咪唔記得仲有個明日大嶼,你百年歸老都未起完,當有神跡佢唔超支,政府都話要六千億,夠你維修立法會一萬次呀!立法會嘅存在,根本就燒你銀紙,使乜咁緊張呀?

「仲有,你睇TVB都知啦,警察因為唔能夠喺有敵意嘅環境下工作,所以只要示威者用好凌厲嘅眼神睥住警察,咁佢哋就會由得你破壞立法會㗎啦。你今年花幾千萬維修,如果出年七一又有人充滿敵意咁撞入去,啲警察又唔能夠工作,咁咪年年都要科水?所以我話,一步都不能退,市民唔可以畀佢維修,除非行政長官下令成立獨立調查委員會,將嗰班濫用暴力兼且喺敵意下不能工作嘅警察,依法革職查辦,挽回市民信心,咁咪畀佢維修一次咁多囉。」藍絲長輩聽了,只能應一聲:「哦。」

馮睎乾
電郵 :
philomusus@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載