› 選擇地區
三藩市
紐約
洛杉磯
其他美國地區
香港 台灣 北美
 
2019年08月11日

政界猛人揭林鄭底牌 - 馮睎乾

資料圖片

我發現,林鄭月娥越來越深不可測:作為一個特首,失蹤多日已經夠怪,一蒲頭就開記招,卻全部是廢話,令大家摸不着頭腦。她到底想浪費你的data,抑或消耗記者精力呢?沒有人知道。這天跟X先生吃飯,乘機向他請教:「到底林鄭想點收科?」X先生是一位非常熟悉政府方針和內部運作的人,以下是他的看法。

「點收科?等政府個劇本寫好,咪可以收科囉。」什麼劇本?X先生笑一笑,答道:「政府咁多年嘅思路,完全冇變,今次亦唔例外。點解林鄭咩都唔應承你呢?因為未傾掂數,個劇本唔完整,自然唔可以攞出嚟見人……」見他欲言又止,我只好繼續問,跟誰講數?

幾經追問,他終於透露:「有兩方面,第一係721元朗白衣人。呢晚發生嘅事,連撐警藍絲都動搖埋,係政府嘅死穴。你諗吓香港大部分人最重視係乜嘢?自由、和平、安全,好簡單之嘛。721話畀全世界知,原來警察可以唔做嘢,甚至同黑社會合作,然後政府又可以顛倒是非,咁即係話香港好唔安全。唔安全,你就連着咩色衫都要驚,何來自由?

「721好重要,但近排發生太多事,輿論開始失焦。當晚嘅事,根本已經推冧晒政府之前所有文宣。之前政府宣傳,話修訂《逃犯條例》,普通市民唔使驚,因為有特區政府把關,又話你唔犯法就冇事,但721已經一大巴打咗落政府塊面。冇犯法嘅市民,甚至冇遊行嘅市民,一樣可以無差別咁畀人打,警察亦擺明唔理,邊個話政府會把關?邊個話行得正企得正就冇事?事實擺在眼前,政府冇得兜。只要全世界日日提住721,記者次次追問警方調查進度,輿論咬實唔放,林鄭就冇可能翻身。

「今次同2014年好唔同,當年警察只係唔清場,由得市民對佔領者反感,所以你冇咩咬得佢入。但今年警察犯嘅錯太大啦,只要你對準死穴係咁打,政府最後就要讓步。如果想堵塞呢個死穴,就一定要元朗地方勢力交人,呢個就係未傾掂數嘅地方。交幾多人,交咩人,告咩罪,有幾多好處……你估一兩個禮拜傾得完?傾唔完,咪要拖囉!」

我問:「咁獨立調查委員會有冇希望?」X先生說:「呢個就係劇本第二個未完善嘅位。獨立調查委員會,係社會最大公約數,有冇用唔好講,但政府要做,都先要解決人選問題。北京冇反對你搞獨立調查委員會,不過唔代表佢冇底線。近十幾年中聯辦對警隊有好大影響力,會唔會查到啲敏感資料呢?政府搵明顯係建制派嘅人查,係廢嘅,但稍有公信力嘅人,又肯唔肯妥協呢?呢度又係未傾掂數。樣樣都傾唔掂,林鄭可以應承你乜?」

政府一味拖,呢段時間示威者有咩要注意?他說:「政府知香港人怕暴力怕亂,又金魚記憶,齋拖已經成功一半㗎啦。只要打多幾次大交,大家就唔知道邊個啱邊個錯,最後示威者嘅支持就慢慢流失。依家連黑社會都出埋,呢班人冇道德底線,開片係其次,最陰毒係佢可以冒充示威者,抹黑年輕人……」X先生說的抹黑方法,我不便公開,但不難猜到。相比起黑警明刀明槍,更可怕的是黑社會陰招。我現在早一步寫出來,希望將來一般市民評論示威者時,務必運用批判思考,想想是否有人在「移屍嫁禍」。

有什麼是抗爭者可做,但還未做的事?X先生說:「第一,我講多次,就係日日打721呢個死穴,因為林鄭同警方依家完全冇得拆。第二,將民建聯同黑警綑綁,要佢哋永不分離。中央撐警,建制派一定要歸隊,冇可能割席。好多人冇留意到北京撐警,其實係一把雙刃劍,好處係穩定軍心,防止警察叛變,壞處係會累死建制派。大家點解唔日日問吓民建聯啲區議員同立法會議員,『你撐唔撐警』、『覺唔覺得警察濫用暴力』呢?記住問是非題,一係yes,一係no,咪畀位佢遊花園呀。」

結論:和理非行動可以升級,前線要慎防陰招,公眾須有心理準備,前線或受抹黑,勿魯莽判斷。只有大家不分化,抗爭才有望成功。

馮睎乾
電郵 :
philomusus@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載