› 選擇地區
三藩市
紐約
洛杉磯
其他美國地區
香港 台灣 北美
 
2002年12月31日

循例回顧 - 谷德昭

當香港係一個大舞台,主角好自然就係政府內之各位高官,集編、導、監兼主演的伯伯明知自己不叫好亦不叫座,仍硬住頭皮係咁開戲,香港觀眾市民得個嬲字。大家心知肚明伯伯都只係一個聽命於投資者的工具,但信心已失,就算識變法術都難改大家嘅睇法。
其他幾位主角又更離奇,除了曾氏兄弟仍能保持明星風采,有幾分官威外,其他都紛紛轉戲路。松哥無端端變了流行曲歌手,其後更轉拍精裝追女仔,追女仔唔係問題,但同時要有作為,可惜欠奉。葉太本來係強硬式性格演員,一向慎言並以眼神交戲,但一個二十三條打亂其戲路,令其變成諧星,非常可惜。一路以嚟,以為葉太可接陳太棒成為柱躉式壓陣明星,但應是俱往矣。冇柱躉式明星就冇收視,你試吓《皆大歡喜》冇家燕姐、《男親女愛》冇DoDo姐,睇吓重有冇人睇?
新加入的幾位閒角則更嚇人,唔係肥頭耷耳成個叮噹咁,就係塊面成日咁長嘅少爺兵,呢類型格,只適合開塘西風月片,大家飲飲酒、猜猜枚、撚撚雀過日辰。在2002,大家已看厭了「Loser」樣,希望在2003,可以看見多些「Winner」。

谷德昭

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載