› 選擇地區
三藩市
紐約
洛杉磯
其他美國地區
香港 台灣 北美
 
2012年04月26日

求學另類出路 - 左丁山

學生豪考完文憑試,只剩番Oral,本以為佢好得閒,點知佢話唔敢去街住,仲要考GCSE加托福噃,考咁多試,無非搵定後路,萬一文憑試有差池,入唔到本地理想大學、理想學院嘅話,就立即申請外國學校。
左丁山對學生豪講:「如果你有決心求學,唔駛驚呀,到加州讀社區學院,接駁入加州大學,一樣有前途,總之要定!」夠膽講得咁大聲,皆因有不少學生循此途徑入到UCLA,UCDavis,SanDiego,Irvine,甚至柏克來。秘書V家姐個女於2010年會考得六個B,甚為失望,竟然唔肯返回著名女子英文中學讀中六,話要去英國或加拿大讀中六喎,秘書V向左丁山問怎麼辦,左丁山就話去英加讀中六考大學,簡值浪費時間、浪費金錢,不如立即去Foothill。細路女於是在2010年12月入讀Foothill。上星期六左丁山到馬場睇馬之際,突然收到細路女短訊,附上UCLA四月二十日電郵,恭喜佢已獲取錄,今秋入讀理學院生物化學系,真為佢開心!去到Foothill讀書要勤奮,不要掛住與來自各地嘅有錢同學開party,先至可以攞到較高GPA,否則UCLA點會睬你。過去左丁山就見過著名女校學生過到矽谷,兩下就俾有錢男生搞掂,同居係正職,返學當課外活動,可憐父母在香港猶懵然不知。
讀社區學院有一個事先冇諗到嘅界外利益,因為社區學院係過渡,想接駁升上著名大學就要在入學兩年內勤力讀書,學好英文。「紐約時報」專欄作家DavidBrooks(四月二十一日)引述一個重要研究:"AcademicallyAdrift"byRichardArumandJosipaRoksa,指美國學生進入大學後,頭兩年就有學業進步嘅學生,只增加七個百分點,美國大學生在批判性思維、複雜推理、寫作技巧方面,有一半人入學兩年後毫無進步。1961年,美國大學生每星期用二十四個小時讀書,今天學生只用一半時間。既然如此,一啲有志氣嘅社區學院學生為求升上大學三年班,頭兩年有可能比正規大學生學習得更快,更勤力!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載