蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月11日

50前中大校董 - 左丁山

今年中文大學慶祝五十周年校慶,會在中大圖書館設置校史展覽廊,讓公眾及學生可以回顧1963年前後嘅創校歷史。
今期中大校刊隨刊附送嘅,有中大校刊第一卷第一期(一九六四年六月版)嘅抽印本,記載當年大學消息,現在當然係當歷史睇。左丁山收到之後立即翻閱一篇,首先注意到一九六三年六月廿四日港督柏立基爵士委任「新大學之臨時校董」,臨時校務處得恒生銀行董事長何善衡先生協助,暫設於恒生銀行內,有此因由,中文大學與恒生銀行關係深遠,歷任中大司庫(Treasurer)皆由恒生高層出任,例如利國偉爵士、林李翹如女士,現任司庫陸觀豪係前恒生副行政總裁。
臨時校董會主席由關祖堯律師(恒生銀行董事)出任,成員有利銘澤、錢穆、鄭棟材、容啟東(錢鄭容分別係新亞聯合崇基院長)、唐露曉(教育司)、馮秉芬(東亞銀行)、劉漢棟(大紡織家,新亞校董)、高登(羅兵咸合夥人)、利榮森(希慎集團)、麥道軻(華民政務司)、賴德爵士(港大校長)、羅理基醫生(議員)、蕭約(耶魯雅禮協會駐港代表)、司徒惠(建築師)、黃用諏教授(港大數學系主任)、胡百全律師、李耀祥、彭紹賢博士及李培樹夫人。
「李培樹」夫人相信係寫錯咗,應該係大名鼎鼎嘅李樹培夫人,中大校刊宜更正。李耀祥係邊位?問賓架D,佢話應該係六十年代著名建築公司「李耀記」嘅東主,李曾超羣女士就係佢嘅新抱,至於彭紹賢博士係邊位,左丁山唔識,賓架D亦都想唔起,要再問吓一啲前輩先。
睇咁嘅校董陣容,好似只係錢穆先生唔識英文,開會時一定以英語為主,錢先生或不能暢所欲言了,何況其他人未必識聽無錫話。錢先生回憶錄曾提及港督及富爾敦爵士有意選任英國人為第一任中大校長,錢先生極力反對,堅持要華人做中大校長,後來就選咗李卓敏為創校校長,但不久之後,或因語言問題及「文化差異」,錢先生就辭去一切中大及新亞職務,掛冠而去。中大校刊抽印本第四頁介紹港督戴麟趾爵士,提及佢有「少校軍銜」,但在第六頁英文版就話戴麟趾係Lieutenant-Colonel(中校),網上資料亦指戴麟趾有中校軍銜,當年中大校刊可能繙譯錯咗。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載