蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年08月25日
馬上成為壹會員

黃嘉豪出88馬經 - 左丁山

英超聯開鑼,馬會賭波投注亦已經合法化,於是左丁山用電話投注,點知落筆打三更,連輸三場,認真氣頂,想話賭波贏錢,唔知困難過賭馬。賽後檢討,左丁山啲馬迷心態未甩,唔鍾意賭一倍二嘅大熱門,明知曼聯贏面最高,仍然要博保頓可以逼和,有乜辦法唔輸吖?阿仙奴對愛華頓,又係一點二五倍大熱,諗住和局機會好高,一於買打和,點知阿仙奴十個對十一個,仍然贏二比一。利物浦主場車路士,車仔新埋班,到晏菲路球場絕少贏波,於是買打和,點知利物浦唔爭氣,令人失望,輸咗一比二,又累左丁山輸錢。

評馬名家黃嘉豪以前跟過左丁山寫馬經,聽完左丁山賭波輸錢古仔,哈哈大笑:「老細,你咁渣,不如信我份馬經,睇吓可唔可以幫你喺馬場贏番。」肥仔豪膽大包天。居然投資出版新馬經,叫做《88馬經》,八月三十日出版,每份只售二元!?嘩,學足肥佬黎策略噃,不過肥佬黎創辦《蘋果》,大把本錢去燒,肥仔豪得唔得呀?肥仔豪話:「希望各位老細、各界友好、廣大馬迷支持啦,貼士唔夠膽話包贏,但我哋絕對專業,全力以赴,首先出版一本《嘉豪第一招》,介紹來季可以吼實長追嘅銀行馬,好有參考價值㗎!」但願如此,聽講來季起碼有三份新馬經出版,競爭激烈,肥仔豪要脫穎而出,祝佢好運咯。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載