› 選擇地區
三藩市
紐約
洛杉磯
其他美國地區
香港 台灣 北美
 
2005年12月19日

真係.愛 - 谷德昭

《KingKong》真係黐鬼線,離晒譜,超好睇。
開頭先慢一個鐘頭,人物逐個慢條斯理魚貫出場,反正大家入場睇《KingKong》都係為咗睇KingKong,所以一個鐘頭耐性點都有,況且雖然話係慢條斯理,但係一樣咁好睇,觀眾跟隨着大導演PeterJackson的引導,順利入戲。之後嗰兩個鐘頭就巴閉嘞,一閘網打開,觀眾好似坐上過山車一樣,打鬥連場,一波未平,一波又起,極盡官能刺激之能事。
雖然部份特技畫面重係有啲唔自然,但係一齣電影可以拍到咁好睇,重喺雞蛋裏面挑骨頭係多餘嘅事。一句講晒幾十蚊真係抵睇,抵到爛!懷住極大嘅期望去睇金剛大戰暴龍,通常呢種情形都會急趕而來,失望而回,點知得到嘅比期望嘅更精彩,齋睇呢場都值回票價有突。

純官能刺激嘅電影好多導演都拍得到,但PeterJackson最犀利嘅地方係重要拍出一個「情」字,「問世間情是何物,直教生死相許」正是KingKong的寫照,據一起睇戲嘅女伴所形容,KingKong係一個粗人,但Man到爆,又浪漫到咩咁,百分百專一,對愛情有承擔,重要鬼咁好打,可以講得係集DreamMan的所有優點於一身,冧到震。「鐵漢柔情尹揚明」是金剛的另一寫照。女孩子們都希望身邊能夠有一隻KingKong,除了寵我、懂我之餘,重可以打走晒啲暴龍。散場時見到不少男士們在女伴身邊扮KingKong,男士們扮KingKong叫一次,女伴們便咭咭笑一聲,呢齣唔係《如果.愛》,係「真係.愛」,愛到盡!

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載