蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年05月25日

東院道官立 - 左丁山

大記者冇工做之後,賦閒在家,無甚寄託,突然有小學校友打到電話嚟,話要搞小學五十周年校慶活動,搵大記者加入「支援隊伍」,大記者欣然答應。
大記者以前本來就讀寶血小學,讀得好好地,阿媽話聽見「東院道官立學校」啲學生好易升上官立中學,將大記者轉到東院道官立。阿媽冇聽錯,但人哋升上官中,你個仔女未必升到呢!大記者入到東院道官立,糊糊塗塗,升中時竟然冇官中肯收,最後入咗所有學生嘅「雷霆救兵」學校──新法中學,與今日嘅一哥鄧竟成及馬時亨局長成為校友。
東院道官立升上皇仁書院嘅大名人就有湯家驊議員,中大醫學院院長霍泰輝、梁承達牙醫等等,其他名人有資深大律師陳景生,金王之子胡經昌,微生物學專家談兆麟,東亞銀行副行政總裁彭玉榮,以及《經濟日報》大股東馮紹波等等,一間小學有咁多學生日後名成利就,並不多見。
問大記者:「你哋五十周年校慶,由邊個做大旗手呀?」大記者話:「其實間學校已於一九九七年停辦,但老師何萬森及陳本漢極為熱心,搵齊上午校、下午校啲老師與同學一齊搞,我去開會見到成班名人,平時幾嚴肅,開會時就講番自己讀小學時幾咁頑皮,唔知幾咁開心。」
東院道官立學校開辦於一九五八,左丁山仲記得佢哋有一位下午校校長容宜燕係校際朗誦比賽評判,比賽之時,容宜燕名字日日見報。大記者話因為聯絡校友需時,要到今年十二月一號星期六先至舉辦校慶五十周年大聚餐,席設銅鑼灣百德新街東湖海鮮酒家(珠城舊址),每位席券只收三百八十元,小童收二百元,可說十分便宜。
諗諗吓,左丁山間私立小學在一九五八年之前已經存在,歷史更悠久,可惜辦學團體(商會)改建新廈之後,就將小學中學執埋,當年嘅小學同學都唔知去邊度搵,睇見人哋辦五十周年校慶,只有羨慕份兒。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載