蘋果日報 | APPLE DAILY
› 選擇地區
三藩市
紐約
洛杉磯
其他美國地區
2008年03月10日

梁承達東院道 - 左丁山

喺馬場七樓碰到牙醫梁承達,問佢點解今季「皇仁飛駒」、「皇仁俊駒」、「皇仁神駒」等皇仁校友馬冚扮爛唔掂,梁醫生話唔係所有「皇仁」系嘅馬都關佢事嘅,啲馬贏唔到,大家冇符。左丁山諗諗吓,「皇仁飛駒」喺上季贏到你唔信,直至跑完打吡先至走下坡,做馬主都唔好要求過高咯。反而梁太高美懿有份(其他馬主包括鄭海泉、柯清輝、劉智傑等)嘅「過關博士」喺今季季初表現良好,柯總與梁太拉頭馬都唔知幾高興。
見到梁承達,唔係想起皇仁書院就係想起東院道官立學校,去年佢哋成班校友搞大聚餐,逼爆酒樓,盛況空前,著名校友梁承達、霍泰輝、湯家驊、陳景生、馮紹波、彭玉榮、梁天明、梁柏濤、陳慧兒等大力支持。第二日就碰到呢班名人嘅老師何萬森,何老兄話東院道官立學校(二○○八年)周年聚餐共慶五十周年創校日會在三月十四日星期五舉行,席設彌敦道七百五十號始創中心五樓(太子港鐵站B2出口)帝皇廷宴會廳下午六至十一時舉行。每人收費三百元,小童二百元,十分相宜,何老兄希望東院道官立學校校友踴躍參加,報名請打電話畀佢(25696191)或找馬玉華同學、李達和同學、何玉琴老師;電郵可傳debmyw@gmail.com
搞校友聚餐搞得咁高興,當然係有一班熱心校友(梁承達、馬玉華等)及一批熱心教師(何萬森、何玉琴、陳本漢、趙穎芙、張妙玲等)之故,其他學校想效法,未必咁容易。
寫到呢度,收到中文大學公關部傳真,邀請聽演講。從中環入中大聽書,路程遙遠,時間甚長,多數冇時間去。但一睇講者,來頭好勁,係當紅炸子雞,當然立即報名啦。呢位講者就係新任世界銀行高級副行長兼首席經濟學家林毅夫教授,在三月三十一日星期一下午五時正喺中大何善衡工程學大樓五樓王統元堂主講「發展與轉型:思潮戰略和戰略能力」(DevelopmentandTransition:Idea,StrategyandViability),用英語主講。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載