蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年01月29日

潘宗光感恩 - 左丁山

新年讀書,有潘宗光校長新書在內。潘校長着人寄來一本《感恩這一課──一位大學校長的回憶》,新年前出版嘅。潘校長係佛教徒,開宗明義,以佛教觀點看事物,潘校長與左丁山在去年十二月尾,一齊參加議員L一個飯局,曾聽佢講過幾句,之後就收到佢送來之新書。新書封面就引述潘校長之語:
「一切有為法,如夢幻泡影,如露亦如電,應作如是觀。我一直用《金剛經》的這句偈語來提醒自己,世間沒有甚麼可以停留下來,平常心是道;心懷感恩,也是一種日常生活的修行。」
「如夢幻泡影,如露亦如電」,呢兩句話對左丁山甚有震撼性,揸住滙豐股票,長期收息不賣,以為可伴我退休,有番些少老本過活,點知道滙豐股價如夢幻泡影,終不免一跌再跌三跌,果真如早晨露水,如行雷閃電,陽光出現後,不見蹤影。香港人常言,滙豐都唔掂嘅話,香港地震咯,如今滙豐股票當真唔掂,大家(特別係退休人士)要為地震作準備。
潘宗光校長原來係中文中學出身,我哋知道佢係聖保羅男女中學畢業,一下子就認為佢必定係英中生。但在五六十年代,香港英中與中中地位平等,聖保羅男女書院同時辦英中與中中,左丁山一位同學,皮膚專家醫生F就係聖保羅男女中中畢業嘅,考評局主席顧爾言亦然。潘校長話佢自幼家貧,靠舅父交學費,住在姑姐家裏,與七位表弟妹一齊,有時交唔起學費,幸得班主任沈淑莊老師與校長羅怡基特別鼓勵,叫佢唔好考試包尾,讀好啲就可以申請免學費(按:今天情況不同,學生考試包尾,校長會叫你鬆人退學),潘宗光果然深不可測,一發功就由尾衝上嚟,學期考試得第六,升班後考第三,高中一考第二。結果羅怡基校長免咗潘宗光嘅堂費與學費,後來聖保羅男女中中生本以升讀崇基學院為主,但羅校長收佢讀英文預科班,結果考入港大讀化學,從此一帆風順,成為無機化學權威,做埋理工大學校長。潘校長好感恩,多謝親戚照顧,多謝聖保羅男女嘅老師與校長,畀佢一個上進嘅機會。今日之中中生,何須在英中同學面前自卑?到圖書館借潘校長本書讀吓啦!

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載