› 選擇地區
三藩市
紐約
洛杉磯
其他美國地區
香港 台灣 北美
 
2012年01月12日

菲律賓落後 - 左丁山

雷鼎鳴教授大作「中國與世界經濟大變局」之內,有一篇文章討論「菲律賓為何如此落後」(六十五頁至七十頁),引述經濟學大師/諾獎得主盧卡斯一篇舊文章(1993),再以較新數字嚟比較南韓與菲律賓之異同。在1960年,南韓與菲律賓人口相若,都係二千零萬,兩國人均收入幾乎一樣,菲律賓人教育水平高於南韓,當時南韓在韓戰之後,掙扎復原,菲律賓從美國手上獨立十幾年,沿用美國民主制度,英文普及,前景更勝南韓。
到咗2009年,菲國人均GDP係三千三百美元(以購買力平價計算),只及中國一半,世界排名162,遠遠不及南韓,講科技、出口、重工業,南韓今日贏菲律賓幾十條街,南韓輸出三星手機、汽車、建造,菲律賓就輸出菲傭、建築工人與香蕉芒果。
想當年,不少香港人(北角福建街坊最多)靠父親在菲律賓打工,寄回披索,維持生活,左丁山就有幾位同學係咁樣。十幾年前,左丁山在馬卡提高爾夫球會會所內,與一位華僑飲下午茶,佢慨嘆馬可斯貪污誤國,害死菲律賓經濟,佢話在上世紀四十年代末,佢從福建走咗去雲南,逃亡出境到咗越南,跟住去柬埔寨,再到菲律賓,做生意發達,佢嘅同鄉親戚自福建搵方法去咗香港,都唔知幾羨慕佢,但眨吓眼去到二十世紀九十年代,佢呢位福建親戚在香港嘅身家係佢嘅幾倍,佢只能原地踏步,能保住財產已算幸運,點解會咁?佢大發牢騷,大駡馬可斯貪污。
但根據雷教授講,貪污不足以解釋菲律賓經濟不濟,馬可斯在1986年下台,至今已有25年多,競爭力毫無進步,以2009年為例,南韓固定投資佔GDP29.3%,世界排名28,菲律賓只有14.3%,排名138,香港呢,有20.9%,低於世界平均22.7%。投資比率低係經濟增長緩慢原因之一,貪污方面,菲律賓廉潔程度排名139,中國排名79,南韓係39,而中國增長遠高於南韓噃,盧卡斯認為最終原因係菲律賓設置貿易障礙未能向外開放(即保護主義),令產業水平長期落後,不能升級轉型所致!雷教授話香港對開放競爭較為適應,但近年呢種核心動力似乎有所減弱,不能掉以輕心!

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載