› 選擇地區
三藩市
紐約
洛杉磯
其他美國地區
香港 台灣 北美
 
2019年04月25日

【黑鏡線索】棄YouTube取Netflix

兩個女主要睇Netflix,月費訂閱同YouTube嘅經營模式截然不同,高度吻合家長嘅需要。互聯網

【黑鏡線索】
我有兩個女兒,一個八歲,一個五歲。小朋友睇電視,以前,主要畀佢哋睇YouTube,但而家已經唔再睇。

YouTube最大問題,係如果你由得個小朋友自己㩒㩒㩒,冇幾耐之後,睇吓佢哋睇乜,往往會發現,佢哋睇緊啲怪怪哋嘅片。乜係怪怪哋?例如,條片裏面有個小朋友不停咁喺度整爛啲玩具,又或者,喺度玩醫生病人,可能係自己形住,但係啲表情硬係奇奇怪怪咁。

YouTube任人上載 篩選有困難

主要原因,係因為YouTube嘅DNA,係任人上載。YouTube自己吹噓,每過一日,就有多65年長度嘅片上載。任人上載嘅優勢好明顯,就係個片庫會增長好快,長到好大。片庫越大,越包羅萬有,即係越多用戶搵到自己想睇嘅嘢,越吸引到人上嚟用YouTube。

但任人上載,當然會有好多唔出得街嘅片,片多嘅問題係,如果用人肉篩選,要有十萬個人每日不停全職睇片先篩得晒。有人問,乜唔係YouTube有大數據人工智能乜乜物物去篩選啲片嘅咩?首先,人工智能係有用,但係有極限。頭先講嗰啲針對小朋友睇嘅怪怪哋嘅片,唔係明顯血腥色情,老實講,連人肉球證都未必肯定知點判。

更重要嘅,係YouTube受自己嘅business model影響,其實幾有心去做好篩選?YouTube主要收入,係廣告。用戶越睇得多片,即係越睇得多廣告,YouTube就越賺得多。2012年,YouTube內部,就訂下咗公司目標:一日要有總共十億個鐘頭嘅播放。呢啲目標,行內叫True North,即係無論幾迷失,總之向住個True North,就一定冇死錯人。

點樣去達標?一係多啲片,更重要嘅係,幫用戶搵下一條自動播嘅片,搵得醒目啲。YouTube投放大量資源去後者嘅algorithm,終於喺2016年達標。而呢啲algorithm,係會咬住你唔放,一旦搵到你心裏面嗰粒掣,就會瘋狂地餵你。對小朋友嚟講,絕對可以係一個問題。拍片公司拍一啲針對小朋友嘅怪怪哋嘅片放上YouTube,YouTube就會好有效率咁播畀好多小朋友睇,然後YouTube同間拍片公司就袋廣告費。

Netflix靠訂閱 啱家長需要

追求高增長當中嘅取捨,唔係YouTube獨有嘅問題,所有靠廣告收入為生嘅公司,都會遇到。我自己第一間startup,一半係靠廣告收入,用戶寫嘅書評,當然我哋唔想篩選,大佬咁煩,同埋,做科技呢一行,好少人有興趣做道德判官,呢啲麻煩嘢,當然避得就避。有報道指,YouTube內部有員工建議公司主動啲去搵有啲問題嘅片去特別處理,例如唔畀呢啲片喺推薦清單出現,即係只可能特登搵嚟睇,唔會自動播畀你睇。但YouTube就叫大家唔好提,因為唔提就可以話唔知,提咗就日後可能有法律責任。

結果,而家兩個女主要睇Netflix,因為Netflix嘅business model,唔係廣告,而係月費訂閱,取捨誘因同YouTube截然不同,個business model同家長嘅需要高度脗合。呢個係明顯例子,唔同嘅business model,例如廣告vs訂閱,個分別絕對唔係起個pay wall咁簡單。

撰文:宋漢生

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載