› 選擇地區
三藩市
紐約
洛杉磯
其他美國地區
香港 台灣 北美
 
2019年08月14日

越南情緒 - 左丁山

越南會安(台灣《蘋果日報》)

暑假快到尾聲,不少人已外遊一段時期。陸續返嚟,準備九月開工,尤其係啲老師,要為九月一號開課做足工夫㗎嘞。今個暑假有幾位朋友去越南,不約而同都去咗峴港享受陽光與海灘。大學行政人員M住在Pullman酒店,話峴港遊客多到極,遲早變成泰國布吉島咁旺,早去好過遲去!當地有靚海灘,酒店有大泳池,唔出酒店可以hea足一日,出酒店就有會安古鎮係世界文化遺產可以觀光,幾適合一家大細前往旅遊。行政M話在酒店見到四大類遊客,日本人、韓國人、香港人、強國人,大家好似識得分開時間出現咁,日韓港遊客吃過早餐就去沙灘泳池,午後各自散去,到咗下午三四時,大量強國人遊客出外觀光完畢,乘旅遊車回來,齊齊撲去泳池沙灘,嘈吵異常,日韓遊客如仍留在室外者,走都走唔切,擒擒青撤退,蔚為奇景。

編輯V亦在同一時間去咗峴港,住在不同酒店,同樣話峴港環境十分理想,可以一遊,美中不足之處就係峴港雖然以前喺南越境內,越戰期間叫做「大南」(Da Nang音譯),係美國空軍基地,有大量美軍駐紮,但現在峴港人能講英語嘅還是不多,與的士司機及食肆侍應溝通要靠Google Translate。編輯V感到意外嘅,係司機及小販檔檔主都問佢:「Chinese, Taiwan? Hong Kong?」,編輯V答:「Hong Kong.」越南人竟然好高興話:「Hong Kong, No China!」態度好友善,編輯V本着記者心態,勉強採訪幾句,略知當地人唔喜歡中國,但好喜歡香港、台灣,佢話有時間嘅話,要到當地做一個較深入採訪,增加了解。

到越南深入採訪係值得嘅,現在中美貿易戰毫無停戰跡象,戰情視乎特朗普脾氣而定,中美港皆要受負面影響;最得益者,就是越南。早有報導話外資在中國撤廠,撤去越南,7月31日(特朗普宣佈再向3000億美元中國貨加徵關稅之前),紐約時報又有長文講越南之外資,設廠爆晒燈,日美韓資工廠蜂擁到越南,發覺已有勞工短缺、生產物料短缺現象,外來投資已超出越南之「吸收能力(absorptive capacity)」。越南月前與歐盟,簽了自由貿易協議,紡織品輸往歐盟,關稅全免,當地嘅車衣女工,多多都唔夠。偏偏越南幾倚賴中國供應原料、材料及配件,但越南人心底裏「反華」,情緒十分矛盾!


mcwriter@appledaily.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載