› 選擇地區
三藩市
紐約
洛杉磯
其他美國地區
香港 台灣 北美
 
2005年05月17日

50萬夜鬼搶硬5.20上市《創世紀》大結局

收視激升的《創世紀》二月重播以來,調查指數全港50萬人追看,更打低亞視黃金時段最高收視!無綫破格為重播劇在黃金時段賣廣告,夜鬼們亦全力翻煲,為咗第朝同其他人交流劇情進展。最爆係連十八、廿二的年輕人都係Fans,網上討論區激變劇情討論區,大家對揹足百集的葉榮添又愛又恨,令撈家(羅嘉良)再次成為老中青偶像!

記者:邵超 攝影:梁細權
模特兒:Phoebe

影視店VCD一入即清

《創世紀》效應強勁,BT友瘋狂Download冇王管,但原來幫襯正版VCD者更加癲!龍頭指標旺角廣視、銅鑼灣節拍連鎖影碟店,自二月尾開始賣出的《創世紀》VCD不計其數。廣視店長話,每兩日就賣出雙位數字的VCD,要不斷返貨。節拍店員Sam說:「近兩三個月Keep住係咁返,每次七至八隻,唔使兩星期又賣晒!」記者向發行商現代音像查詢,發言人Agnes都話無諗過賣斷市,相信是電視劇效應,而《創世紀》大結局Boxset就於5月20日推出!

羅嘉良:
近排有人叫我「葉榮添」

羅嘉良話:「無諗過套劇咁Hit,出到街有後生仔叫我葉榮添,餐廳啲人又會追問劇情。未敢講呢套係自己最滿意演出,但好開心!自己有時間喺屋企就會追睇,感覺好好,當係溫故知新。」除咗近排改名叫阿添,娛樂版話近一個月撈家狂接內地廣告,勁袋三百萬!

蔡少芬:
睇番好肉酸!

「呢排好多朋友追問劇情!我識得有個老闆娘追開套劇,重專登畀員工每日遲15分鐘返工,唔睇嘅人就要準時返工。我自己睇番在廣州跳豔舞嗰段覺得好肉酸,𠵱家跳一定好睇好多。」

監製戚其義:
唔係好記得囉!
「咁耐嘅嘢唔係好記得,總之個個演員都好,套劇好長,觀眾可以慢慢追。」

陳錦鴻:
茶客同我傾劇情

「啲茶客成日捉住我傾劇情,我死嗰集都要特登拉埋我睇。套劇其實幾深,Miss一集就唔知講乜,套劇擺黃金檔期無人有時間細心諗點解我由忠咁快變奸,𠵱家深夜播反而可以集中精神睇,啲人就睇出戲味。」

無綫廣告價即升20%

睇無綫替《創世紀》在黃金時段賣廣告,就知呢套重播劇有價有市。市場及營業部總監梁健華回覆,過去深宵劇收視約3?點,《創世紀》有6?點,勁升一倍。由於廣告時段有限,多咗廣告客戶爭,所以廣告費比平時增加20%。

學者解構:
因為葉榮添代表香港人

現時不同界別的人都狂追《創世紀》,理大應用社會科學系副教授何國良分析如下:
1.70集的《大長今》將好耐唔睇電視劇的觀眾拉返嚟,令他們有番追劇的趣味,《創世紀》有成一百集更加啱潮流。
2.以前啲卡士同製作好有Energy,個個角色對生活有火,劇力好吸引,翻諗好似有啲嘢喎,呢種感覺真係久違了!
3.香港人暗啞底認同醒目仔,後生仔對於劇中刀仔鋸大樹,挑戰巨人、大企業抱有憧憬,所以好多十八、廿二後生仔睇。
4.葉榮添是典型香港人,為求成功不擇手段,不忠不奸,做嘢一定要「Cher」到盡,要所有人幫他,衰咗至知家人、朋友的重要。觀眾想個天收佢,但又唔覺得佢衰到要死,呢種矛盾最引到人追睇。
5.將主角放喺兩難處境,由《家變》、《狂潮》已經係呢條Formula,呢啲係香港電視劇文化。

CD已斷貨!

差啲唔記得羅嘉良識唱歌,近排睇番《創世紀》,又覺得主題曲及插曲《准我留下》、《天地有情》好有Feel。不過去到尖沙嘴HMV想搵番呢隻《羅嘉良創世紀》,偶然豎耳聽到隔籬一對拖友都係同道中人,可惜過咗五年已經斷晒貨。當年雙CD+VCD夾埋50首歌都係賣$48,雅虎香港拍賣網站有人叫價$150,唔知出品商會唔會乘勢再次發行?

《創世紀》TalkingPoint

葉榮添對Helen太衰,但想彌補又返唔到轉頭的感覺好動人!

文彪死咗,阿添和自強繼續起起跌跌,觀眾好想知佢哋的收場。

好多人同情張自力,他報仇的勁喪程度癲過阿添,係可憐的奸角!

夜鬼講場

Phoebe(城大學生)
「朋友住Hall,夜晚一齊煲《創世紀》。葉榮添性格好吸引,但唔覺羅嘉良靚仔。」

Katy(LowBClubSales)
「一收工返屋企就煲,入面無個演員特別鍾意,但劇情真係好緊湊、好刺激。羅嘉良做葉榮添做得好出,好吸引!」

Miyuki(巨集物坊Sales)
「由十幾集開始追,葉榮添似奸又似忠,好嬲佢害死穎欣。唔鍾意個角色,但又覺得佢身不由己。」

Heidi(酒店公關)
「朋友都有返炒嚟睇,放工返到屋企Settledown啱啱好開場。個個都做得好好,有戲味,好想片尾播預告。」

阿輝(Sales)
「間中追,嗰個時段無嘢做,𠵱家無咁大製作,當係歷史劇咁睇!一百集唔記得晒劇情,惟有當新戲咁睇。」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載