蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年08月17日
馬上成為壹會員

Fans數爆AvrilLavigne
12歲就迷戀

本文記者為青春不再小器無度的女子。
女人不偉大,憎人理由很變態。我口講嗰句憎人樣衰口臭自私冇品,不過凡此表面種種,其實藐兩三聲就算;真正令我恨到入心入肺者,從來只得一類──哎呀,一樣係女人,你係要生得細過我靚過我叻過我又嫁得早過我?有冇搞錯!
所以AvrilLavigne,23歲、天之驕女、嫁咗,注定不得我歡心,聽日佢開騷,我又撲唔到靚位飛,唔嬲,就枉為小器女人。今日一於數爆佢!
記者:劉嘉蕙
攝影:楊錦文
部份圖片:SonyBMG

平貴兩極飛 無得留低

AvrilLavigne,法文名也,中譯「4月(Avril)葡萄園(Lavigne)」。名,未必個個識解,但呢名加拿大小天后紅到發紫就人人都知。新碟《TheBestDamnThing》出唔夠4個月,全球銷量破500萬張。喺香港,電視台上個禮拜選港男,泳裝環節都全程播Avril新作《Girlfriend》。聽晚佢開騷,貴飛$880企位同最平的$480晨早去晒!記者截稿前打去問快達票,接線姐姐以略帶緊張語氣同我講「只餘少量座位咋」,一副驚我遲一分鐘訂冇得買咁款。再細問,截稿前還有$680四連位飛,不失為最後出擊之選。另外,同izzue出「TheBestDamnGreenThing」環保ToteBag,限量版200個3日沽清,唱片公司將九代單傳親筆簽名版擺上Yahoo做慈善拍賣,前日截Bid,原價$129一個袋,唔夠一個禮拜炒至$9,000!

AvrilLavigne:我唔Punk

傳媒講Avril喜歡加「Punk后」字眼喺左近,其實Avril出道第一Day就話「我唔Punk」,一身SmokyEyes骷髏骨爛牛打扮純粹出於鍾意,夾Band寫歌係想呈現女生心事。樂評人袁智聰都話,Avril不Punk,「我會形容Avril為流行搖滾歌手,其實佢形象好Casual、好鄰家女孩。」確實,青春毋須歸類,呢頭努力唱歌,嗰頭簽模特兒公司FordModels,喜歡又走去拍劉偉強套西片《TheFlock》同RichardGere合作,大把世界!

粉絲死跟 微量潮Look

有時人型,真係天生。Avril曾在訪問中自白「自細同學就鍾意跟我着衫」,證明做潮流Icon真係命。睇勻Avril全身,全部細件又易搵,照執零難度,不過型唔型又另計,連死硬粉絲都只能跟其微量元素,TotalLook還是抄不來。

例牌Converse

Avril長年腳上金蓮,CONVERSECONVERSECONVERSE!CasualLook襯佢,魚網絲襪又襯佢,都掂!證明女人其實唔使買咁多鞋。可惜我與粉絲雖都腳踏Converse,神髓,卻沒半點,不拍照也罷。

骷髏骨上身

骷髏骨頭,Punk妹佳品。Angie照跟都有對骷髏鞋。

黑白無間道

Avril愛黑白,着佢唔夠,仲要彈。Clare一手一腰都係Avril至愛打扮。同場加映Fans齊晒甲,有齊黑白與粉紅。

不死SmokyEyes

化SmokyEyes有技巧,唔使我講,好似Avril咁,Smoke足5年都咁自然就真係有技巧。Angie仍須努力!

無添加走紅

青春偶像,一般兩三年見底,Avril17歲出碟,5呎1人仔細細卻中氣十足,紅足5年,兼越戰越勇。甫出道黑衫黑褲板妹Look,全球叫好。話說上世紀90年代尾,歐美流行樂壇捲完BoyBand潮後捲甜心偶像潮,BackstreetBoys、SpiceGirls及BritneySpears等過度包裝PopIdol紅得快,殘得更快,好不容易爆出無添加純才華Avril,有如JunkFood中一條青菜,成名作《Complicated》,MV夠叛逆。舊年7月同樂隊Sum41主音DeryckWhibley結婚,才不過二字頭。「仲要唔係奉子成婚呀!」Fans話。婚後人氣有增無減。

歷年出過3隻大碟,02年處女大碟《LetGo》至今全球銷量破1,600萬。音樂上,袁智聰話Avril無法歸類,「任何講法都係以偏概全,硬要講,Avril歌曲風格最接近PunkPop,至於佢點解成功,可能係佢講到青少年苦悶情緒,又唔係TeenagePop式魚蛋歌。」

今趟數AvrilLavigne,香港歌迷會全程力助。採訪當日天陰陰,大家冒住俾雨淋濕之險,照樣一袋二袋珍藏搬上唱片公司畀我影。

粉絲嚴選5大珍藏

1.超罕首個Fans聚會飛

第一個香港Fans聚會TieUpShow門券,年份為2003,冇真人睇,全程淨播片,都有200幾人出席。

2.未紅時CoverGirl

Avril初出道雜誌封面,「嗰時(02年)佢未紅,好難上封面㗎!我搵咗好耐先搵到。」物主Angie說。

3.集體回憶軟手鈪

首隻大碟《LetGo》附送粉紅色軟手鈪,見證那個買乜都送軟手鈪的年代,集體回憶呀。

4.中文版新碟

新碟《TheBestDamnThing》中國版,全球限量500隻,只供網上訂購,贈品多。

5.真真假假簽名

Avril簽名,據聞個個不同,網上見到未必係假,又未必係真。

一粉絲一故事

我12歲聽佢

Anton年方16,開始聽Avril時還是兒童,「同學個個聽Twins,溝通唔到。」青少年不都怕朋輩壓力嗎?「我又返唔到轉頭聽Twins。Avril啲歌好特別,唔係K歌。」同輩唔識唔緊要,她在Forum裏大把朋友,有許多比她還小,看見有小Fans上網問阿媽唔俾睇Avril點算,她慶幸自己爸媽不反對,「迷外國歌手有度好,可以學英文,佢哋不知幾支持。」

Anton
職業:學生
Fans年資:4年

DIY偶像帽

Clare一身Avril味造型,又腰又手又鞋,加上DIYAvril帽,大方任影。公司貼滿Avril物件,家裏的珍藏用幾個箱來裝,「天氣潮濕會走樣,所以我有擺臭丸,頭先執出嚟都驚你見到。」

Clare
職業:文員
Fans年資:5年

買齊歐美日版碟

Angie個樣鬼鬼哋,化埋SmokyEyes唔似Avril,卻似南拳媽媽的Lara,採訪全程恍如人肉Wikipedia,記者指乜佢都有Reference,篇報道一半字靠佢撐起。
大學主修中醫的Angie,直言宿舍貼滿Avril,手指又學Avril搽完黑又搽吓粉紅,Avril出碟,起碼買歐美日3隻版,咁咪使好多錢?「我都唔敢計。」Fans一律講心唔講金,「佢最近上《Maxim》封面,你知女仔好少買呢類男性雜誌,我哋去畀錢時不知幾驚。」Fans圍圍企,她像大家姐,幫記者揀造型分析歌路,不過數私人珍藏,她只有一樣不公開的瑰寶:「我生日,細佬自己整張Avril生日卡畀我。」說時個樣勁Sweet。

Angie
職業:學生
Fans年資:5年

為她瞓唔着

Bowie喜歡Avril由歌詞開始,覺得講中人心事。「最癲嗰陣成日黐住Forum,一聽人哋講邊本雜誌出就走落街買。演唱會之前嗰晚一定瞓唔着……其實今日同你做訪問講Avril,我都瞓唔着。」

Bowie
職業:做緊嘢喎
Fans年資:4年

愛毋須理由

Fans是可愛動物,示範愛一個人毋須太多理由,阿青少出聲,但訪問過程開心照聽。今次訪問尚有幕後功臣Celia,幫手Call人晒珍藏,可謂有心歌迷,讀者有興趣可以上網參詳一下( http://www.avrilhk.com )。

阿青
職業:學生
Fans年資:5年

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載