› 選擇地區
三藩市
紐約
洛杉磯
其他美國地區
香港 台灣 北美
 
2007年10月02日

戴子珽率先踩場
圓方8大插旗實錄

「總有一間喺左近。」講的不是便利店,而是越來越大的Mall!6月紅點(MegaBox)未紅透,10月圓方(Elements)便於昨天進駐九龍站上蓋迎戰!朗豪坊Sell高聳入雲,圓方來個橫向發展,只4層,但1層的面積就等於朗豪坊的總面積之q。場內有海景冰場、戶外花園、名店街等,並以五行分區,咁玄咁盞,靚女風水師戴子珽一於以玄學會圓方五行,睇吓個場有幾堅!


記者:馮冠芝 
攝影:陳陶鈞、譚盈傑
模特兒:Eugene、Daniel@IG綜藝社群 
Hair&Make-up:JanSuen@OnemakeUp

八白星當旺8大第一次 

行到正門師傅屈指一算,發現圓方向星為八白星,簡直對正好位旺到爆燈!正門八白星,場內亦有8個首次本港的首見位,想行圓方沾其旺星之氣,就要昅實呢8粒星。

百萬尺橫向巨場 超朗豪坊趕又一城

地鐵九龍站旗艦商場「圓方」,商場面積佔100萬平方呎,都說單一層的面積(約40萬平方呎)就等於朗豪坊的總面積q,惟與又一城面積相若。商場佔兩層(另有地下冰場及頂層空中花園),是香港首座橫向大型商場。全商場以金、木、水、火、土5種元素劃分,因而取名「Elements」。中文名看似九唔搭八,實際上是Logo中5圓形為元素,戶外花園稱CivicSquare,商場「圓」中有「方」之意。戴師傅指設計者善用「天地交融」之意。

設計用五行吸引所有人

圓方平地一聲雷,進駐一向了無人煙的九龍站絕對唔係儍仔之舉。戴師傅指,商場旺不旺,3分巒頭7分理氣。巒頭指外來環境,圓方是東北靠獅子山、西南見維港,是暴發格。再加上其門口夠大,能「採納理氣」勁吸人氣。對於用五行作商場主題,戴師傅忍不住說句高明!「每個人都愛接近自己命格中所欠的五行,商場五行齊晒,可吸引所有人。」小記也被吸住,甫進圓方,發現格外光猛,因其有4萬平方呎的天窗,師傅指採光即採人氣,又一項興旺人丁之設計。不過玄學設計好,內涵唔知有無料到!

1.IceRink 海景冰場旺桃花

Rink是本港首個以八達通收費的溜冰場。收費閘喺正滑冰位,真正踏在冰上才收錢,超抵玩!師傅話冰場屬金,屬木的女仔去溜冰可旺桃花。冰場聲稱可180度睇晒維港靚景,天花又鑲滿像星星碎燈,咁浪漫,必旺桃花。

2.名店街內置樓梯

現時大型Mall必有10間8間名店在手,但今次特別在於名店街有5間名店,包括Tiffany&Co、Lanvin、Mulberry、Escada、Versace,店內全有獨立樓梯直上2樓,彷彿去了歐洲掃貨。名店街在「金」區,師傅指金為西方,名牌全是外國貨,襯到絕。

3.首插旗品牌 粒粒紅星

圓方首次引來多間外國名牌進港,例如年輕人必「潮拜」的日本運動品牌OnitsukaTiger、與國際設計師合作的日本家居品牌BalsTokyo等。就連食都有新插旗,推介裝修勁靚的餐廳Megu。

4.六星級廁所必噴Armani香水

去廁所發現有成支Armani香水放在化妝位,並非有人冒失遺下,而是廁所提供!去商場廁所俾你噴名牌香水,真係本港首創經典!

5.男人街 獨家為猛男

平時情侶行街男人的作用在於提手袋及講句「兩件都幾好睇呀!」。這本港首條商場裏的男人街,有男士鍾愛的牌子如Dunhill、錶店IWC等。悶悶哋又可以去Nespresso嘆杯香濃咖啡,最特別係有雪茄店CigarEmporium,邊個話只有女人愛Shopping?

6.CivicSquare 花園同太古廣場一樣大

圓方頂層是一個大型花園及8間食肆。齋一個花園已有太古廣場咁大,為全港最大的商場空中花園。食肆Megu也是首次來港。行得累上來吸新鮮空氣,植物利文昌增名氣。

7.首間超體感戲院 震騰騰睇阿Jack

場內戲院TheGrandCinema為全球首間「超體感」影院,椅子會配合劇情震動,10月18日率先獨家首播3D版《怪誕城之夜》,唔去廸士尼都可震住睇阿Jack,真係諗吓都興奮。

8.名牌童裝街 𡃁仔都要穿Dior

成日話女人使好多錢,其實生一隻化骨龍所花的錢可能係一個女人的兩倍。特別在圓方有條名牌童裝街,有Dior、Nicholas&Bears等,真係一家大細,全部大使。

水區旺財和諧
五行中最得

今次圓方用五行設計,每區都有一個代表藝術品,細緻得連師傅都忍唔住問﹕「個設計師係咪行家?」佢最Buy水區的藝術品《Harmony》,它有十支金屬水柱,師傅話十屬土,土生金,金生水,本身便能形成一個五行循環,所以又圓滿又旺財。H&M與Zara一向不在同一商場開店,有你無我,但在《Harmony》緩緩流水下兩店「冰釋前嫌」相鄰而立,名副其實!

金區彙集頂級名牌及世界級食肆;冰場、戲院全在火區,年輕潮流品牌則盡在土區;木區賣家品走自然路線,與空中花園好夾。

香港商場萬變史
60、70年代 商場彈起

商人將百貨公司的營商模式引進香港,商場則是由百貨公司演變而成。戴師傅話尖沙嘴本身是香港旺地,怪不得海港城一直是商場界龍頭。

海運大廈(1966至今)

本港最早落成的大型商場,87年進行大翻新,與海港城、海運大廈串連,成為全港面積最大購物中心。

信和中心(1979至今)

以售賣潮物見稱,90年代賣明星相出晒名。「信和賣『四仔』,4樓無格仔」,信和特色是也。04年海關幫信和洗底,現在以賣精品漫畫格仔店為主。

80、90年代 大小場百花齊放

80年代經濟繁榮,商場連接鐵路及大型屋苑、特色小型商場等百花齊放,大型場有音樂噴泉、小型場貨品有特色,大小齊心鬥贏百貨。戴師傅贈言:置地之所以咁紅,在於其在地鐵上蓋,充份吸了龍氣人氣。而此年代經濟暢旺,幾個場都做得起。

置地廣場(1980至今)

今時今日名店進駐各商場,20年前有錢人要買名牌,就非去中環置地廣場不可!時至今日,其名牌王者地位依舊屹立。

高登&黃金(1980至今)

高登黃金在70年代主做時裝批發,因鄰近鴨寮街,漸變成電腦商場,開創「砌機」文化。商戶更建立網站宣傳產品,後設討論區,成為具爭議性的高登討論區。所以,高登黃金,影響甚深。

沙田新城市廣場(1984至今)

當初未起沙田站,新城市因位置偏遠而乏人問津,後得八百伴以每月$10/平方呎租起一半谷起人氣,後來有火車站連接,商場更旺。

時代廣場(1994至今)

以前,電車車廠、舊街市是銅鑼灣寫照,直至時代廣場空降,銅鑼灣成為年輕人逛街潮點。

97-04 小型場獨戰

97香港經濟直插谷底,大財團無心戀戰,小型特色場獨撐難關,同時不少人由月入幾萬蚊變成失業大軍,亁脆無業變創業,成為小型場租戶。其中設於西九龍商場、天后等的蘋果商場最響朵,特色係舖位有咁細得咁細,密食當三番視為生存之道。而潮人場如百利、利時亦於90年代紅極一時。逆巿奇葩首數98年開業的又一城,縱橫交錯的扶手梯設計,迫你行勻全場,戴師傅話此為龍舌格吸人氣,熱帶雨林亦創概念場先河。

04至今 大型場強戰回歸

沙士後大型商場如雨後春筍,而且越嚟越高大威,可惜內裏的名店卻如出一轍!連以為必然哄動插旗老蘭的朗豪坊,戴師傅亦話因商場離地太遠,人氣則減,所以朗豪坊以天梯作龍舌,將人氣扯上來帶旺番個場!至於同為本年登場的MegaBox,戴師傅話牌面所見巒頭不及圓方好,但所謂理氣佔7成,所以勝負難知!

ifc(2004至今)

名店林立,新一代上等人商場。

朗豪坊(2004至今)

高聳入雲,入面的「通天電梯」為全港最長。憑建築取得香港工程師學會卓越結構大獎,本身已是件藝術品。

apm(2005至今)

強調行得夜,年輕人去夜街新蒲點,實行am、pm都留在apm。早前更舉辦會考放榜前夕請歌星徹夜打氣,Young到爆。

MegaBox(2007至今)

雖然當初大家貪新鮮,但搭多幾次ShuttleBus便不禁煩起來。Elements與MegaBox到底誰勝誰敗,拭目以待。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載