› 選擇地區
三藩市
紐約
洛杉磯
其他美國地區
香港 台灣 北美
 
2008年11月05日

Thanks!Thanks!Thanks!黎彼得

「六嬸、三太公,大眾開枱啦面以蓮蓉……」三十年來關於打麻雀的歌只有這一首《打雀英雄傳》,到今時今日逢新年都仲係播《財神到》,還有講加價的始終《加價熱潮》最到肉,這些抵死傳神的歌詞,全出自黎彼得手筆,香港人也真要跟他講句Thanks,謝謝他的詞,我們過年過節飲酒打牌總有首啱唱的歌。黎彼得絕對就是你每晚在電視都見到,專做市井「麻甩佬」的黎彼得,同時也是剛剛拿了CASH成就大獎的那個黎彼得﹗

記者︰黃家欣
攝影︰陳盛臣(黎彼得)、林栢鈞(楊子衡)、黃家欣

「我時常清風兩袖,吊兒郎當最自由」《杯酒當歌》歌詞

通俗而不cheap!

出自黎彼得手筆的歌詞達二百多首,當初由寫專欄輾轉經朋友介紹,開始與許冠傑合作,創作出生鬼的《打雀英雄傳》、看破世事的《世事如棋》、深情的《浪子心聲》,被冠以「鬼馬填詞人」的稱號。CASH日前頒發成就大獎,以表揚他對樂壇的貢獻,CASH行政總裁楊子衡表示,「黎彼得的詞膾炙人口,而且所涉層面廣。他會以通俗俚語寫詞,但從不會Cheap!」他更非常欣賞Peter出色的講故事技巧,「每首歌都有完整故事,畫面豐富,好似《十個女仔》咁︰十個女仔,九個認細,明明係老,佢話唔係……」楊生仲突然高歌起來,可見黎彼得的填詞生動活潑,很易入腦。「Peter填的詞唔單止押韻,更從來都無聽過填半粒唔啱音的字,𠵱家好多詞都唔押韻,仲時時有啲字唔啱音,所以Peter的造詣很高。」原來黎彼得學歷只有小學程度,自幼父母雙亡,10歲開始賣報紙維生,所有的知識,都是自己睇報紙、睇書學返嚟。印度商行後生、油站入油員、紅牌(的士前身)司機、私人司機等各行各業都做過,接觸人面廣,每首詞都是黎彼得日常觀察所得的故事,「當年我做過麻雀館睇場,睇得多,所以咪寫到啲人打麻雀的的表情、心態。」

劉天賜:後無來者

劉天賜於無綫工作時,經阿Sam介紹招攬黎彼得到旗下,Peter一直尊稱賜官做「師傅」。對於黎彼得填的詞,劉天賜直言是「前有古人,後無來者」,「滿清中葉廣東地區,嶺南鬼才們都市井中吸取民間心聲,運用最草根的語言表達思想,俗中得雅。」將俗的文化提升至普羅的「雅文化」,黎彼得的《打雀英雄傳》,就是以描繪小市民日常生活,當中絕無半點書生思維的用字,這就是極為樸素的小市民心聲。黎彼得出身市井,寫小市民心聲固然一絕,30年前寫下《加價熱潮》,年初通脹報章雜誌找他出來訪問,彷彿成為小市民代言人;來到年尾市道轉差,係時候轉播《世事如棋》「每局都光怪陸離」,當初填詞有想過咁歷久常新嗎?「當時無咁諗,只係我同阿Sam都有個宗旨,不能教壞人,好似《尖沙嘴Susie》表面係寫魚蛋妹,但去到最後一句『但望阿Susie光陰咪亂散,青春一去空悲嘆』成首歌意思好正面的。」講真黎彼得唔解畫,真係唔知道輕輕鬆鬆的曲詞背後,其實在曉以大義。

Monica教戀愛智慧

擅寫市井面貌之外,黎彼得的對人生、對愛情亦自有一套奇觀,滲透歌詞之中,為梅艷芳填的《將冰山劈開》hit極一時,而張國榮的《Monica》更是他最紅的一首情歌,輕快旋律下,寫的原來是失戀心聲。問黎彼得20幾歲已寫得出《世事如棋》,如此早熟應該沒有經歷衝動闖禍的青春期,他反問︰「你有無聽過《Monica》先?《Monica》是首失戀歌,不過旋律快可能無乜人發現。講一個初出茅廬少年,不懂珍惜女朋友,回想先發覺女朋友教識自己好多,不過既然分手了亦唔好拖拖拉拉,『此美夢永遠藏於心底』啦﹗」當年已講分手要撇脫,可憐今日仲有好多情歌在叫生叫死,所以劉天賜亦說「後無來者」,「那些無厘頭,押韻的廣東曲只不過是順口溜,流行過後再不聞響。彼得的詞,其中有意,大部份流傳至今還在下一輩流傳。雖然今天年輕人講潮語,但未見有潮語入曲,仿效黎彼得的填詞人一個也沒有。」黎彼得也說現今的流行曲不是他那杯茶「𠵱家寫愛情梗係難,因為時下的人都係同機器發生感情多,鍾意對住電腦打機,多過對住人,仲有乜情可言﹗」那麼人生哲理又有無人寫得好?「現時最出名的填詞人就係Wyman同林夕,第三個我都講唔出。林夕都有寫過佛學哲理《觀世音》、《木魚》等,不過我就唔多明白,可能我無信佛啦﹗」

黃子華︰真正藝術家

八十年代後期黎彼得入了電視台淡出詞界,到99年殺出了黃子華,一口氣替他填了《關老三》、《做馬仔》等五隻歌。「當時拍《宋世傑》跟黃子華初相識,每日收工佢都帶埋女朋友來我屋企坐,我心想︰『做乜呀?三顧草廬呀?』最後我問他,他才說想做隻碟,我很欣賞子華,便鼓勵他去做﹗」黎視黃子華為好兄弟,原本得獎想叫子華幫手唱《關老三》,不過知道他正拍劇就免得打擾了。而黃子華則說︰「黎彼得是個真正的藝術家,要好小心呵護他的靈感,當時作詞我相伴在側,一邊飲啤酒,一邊傾,佢無feel亦唔會填,有時我只可以提出個主題,任佢發揮。」黃子華去年底在棟篤笑中還唱了黎彼得的舊作《第一次》,「難求緣份至、難求全合意,始終都有第一次……」黃子華問黎彼得箇中意思,黎答案簡單「鹹濕囉!」黃子華說︰「我諗我唔講出來,好多人都唔知《第一次》其實講乜,黎彼得的愛情觀其實很特別。」是特別看得通透,還有一份坦白。

當年知心友

黎彼得回想,也覺得自己特別受女性歡迎,玩到癲晒無避忌,皆因大家信得過佢人品,Peter亦說自己從無歪念。(圖右為錢慧儀)

《笑八仙》有一幕要在關之琳胸前寫字,黎彼得叫她搵美術寫,但關之琳信得過他,叫他自己寫,結果造就這個黎彼得口中的「經典場面」。

與劉嘉玲、吳君如等初出道時已認識,「影呢張相時,劉嘉玲的廣東話仲未講得正,我有時都會教佢講。」

對新演員及內地演員特別關照,經常請食飯,一大班人柴娃娃,甚受後生一輩歡迎。(前排右一為楊怡)

黎彼得填詞作品
許冠傑1976-1981年共70首作品

《浪子心聲》、《打雀英雄傳》、《梨渦淺笑》、《有酒今朝醉》、《點解要擺酒》、《夜半輕私語》、《財神到》、《錢會續繼嚟》、《佛跳牆》、《咪當我老襯》、《賣身契》、《世事如棋》、《學生哥》、《父母恩》、《十個女仔》、《錫晒你》、《知心友》、《加價熱潮》、《尖沙嘴Susie》、《夜夜念奴嬌》、《摩登保鑣》、《印象》……

其他歌手70s共三十多首作品

陳任《人加我又加》/許冠英《蝦妹共你》/關正傑《俠骨無情劍》/林子祥《各師各法》/馮偉棠《常在你左右》/葉振棠《發窮惡》/羅文《蕭十一郎》/夏韶聲《點解講粗口》

80s五十多首作品

譚詠麟《天邊一隻雁》、《愛人女神》、《風中勁草》/鍾鎮濤《她》/彭健新《提防小手》/張國榮《不管你是誰》、《Monica》、《第一次》、《分手》/梅艷芳《情愛火花》、《將冰山劈開》、《夢裏共醉》、《心肝寶貝》/李龍基《白衫白褲》/小虎隊《不可再睡眠》/呂方《今夜狂舞高歌》/劉德華《但願未流淚》/梁朝偉《未出現空間》/蘇永康《妳是我靈魂》/杜德偉《我心換你心》

90s

黃子華《關老三》、《我愛你一世》、《您大晒》、《請不要關機》、《做馬仔》

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載