› 選擇地區
三藩市
紐約
洛杉磯
其他美國地區
香港 台灣 北美
 
2008年11月13日

郭可盈極趕急講郭藹明

掘金掘雞掘雞骨,見人講到條脷打結,把嘴不停開開合合投晒降,真係笑到肚痛。仲以為歌星、藝員、主持靠把口搵食,點知都係讀到嗌救命,原來讀唔讀到急口令同口才完全無關,連平日Rap到開巷嘅農夫,一樣唔多掂。唔信?大家不妨試玩吓。

記者:吳允冲
協力:王震遠、許維雅
攝影:陳陶鈞、陳盛臣

C君(左)挑戰:「郵差叔叔送信純熟迅速送出。」(郵妻蟀蟀信信信信……呢句好難,整蠱人一流呀。)

陸永(右)即興作急口令:「寧可睇《蘋果》,睇到型咗,唔好睇睇吓停咗,一睇就明囉。」(無乜難度?你將『蘋果』改做其他報紙名,唔順口咪繞口啲囉。)

郭可盈挑戰:「郭藹明見過郭可盈,話郭可盈個袋型,郭可盈叫郭藹明過海改個袋型,改成郭可盈個袋。」

搵到當事人試玩,可盈5秒極速完成,無懶音無錯字,絕招係:「讀嗰陣唔好太急,要理解內容,個腦諗定下一句。」我諗佢平時背慣劇本,工多自然藝熟囉。

農夫都有口窒時

農夫日Rap夜Rap,作歌要啱Beat順口兼押韻,斷估玩急口令好掂啦,點知唔係喎,要逐個字慢慢讀先唔會讀錯,之前開「演嘢會」,農夫都有玩急口令,C君:「我哋『郭可盈』同『邰正宵』都玩勻,仲有星爺唐伯虎點秋香嗰段『小人本住在蘇州嘅城邊,家中有屋又有田,生活樂無邊』……」平時會唔會玩急口令Battle?陸永:「無啦,小學嗰陣成班同學都會圍埋玩嘅。」

極速神級組

布偉傑挑戰:「我姨媽宜家喺宜家傢私買緊𠵱家啱用嘅宜家傢私。」

阿一講廣東話,字正腔圓過好多香港人,平時都有練習急口令,挑戰3秒一TakeOK,雖然難度得一粒星,都足已令唔少香港人汗顏。

江若琳挑戰:「財政司叫邰正宵做財政司,邰正宵叫財政司攞台證先,財政司話畀邰正宵知,要攞台證先要搞掂財政先。」

估唔到江若琳咁勁,問佢使唔使練習吓先,佢爽快話:「唔使!」結果7秒內一字不錯讀完!字字音準,嚇呆一眾圍觀者,叻!

龜速之星組

林海峰挑戰:「郵差叔叔送信純熟迅速送出。」

讀十幾次都讀唔到「送出」,最尾要擘大個口超大動作先發出正確讀音,Jan話急口令易學難精,咁點先學得識?Jan:「多啲聽森美小儀個節目啦!」

胡琳挑戰:「床腳撞牆角,牆角撞床角,你話床角撞牆角定牆角撞床腳。」

Bianca一見急口令已經呆咗,抱頭大叫向農夫求救。Bianca俾「床腳」、「牆角」考起,爭啲讀到撼頭埋牆,在場人士爆笑。

梁奕倫挑戰:「掘柑掘桔掘金桔,掘雞掘骨掘根骨。掘完根骨掘金桔,掘完鬼骨輪雞骨。」

Ronald先練習幾次,點知讀極都讀唔正,佢話要上訴:「急口令考急才,同咬字準確係兩回事,我自問咬字準確,但玩急口令好弱。」佢仲分享咗幾個高難度普通話急口令,「西施死時四十四」、「4是4,10是10,14是14,40是40,14不是時事,40不是死屍。」

陳偉霆挑戰:「圓圓遠遠叫圓月,叫來圓月來賞月。圓圓說:月月圓。圓月說:圓圓月。圓圓說:圓月的眼圓比月圓。圓月說:圓圓的圓眼比圓月。究竟是圓圓,圓月的眼兒圓,還是圓圓的月兒圓。」

William跳慣勁舞,一口氣24秒唸出超長急口令,全程小心翼翼,無讀錯,不過真係慢咗啲喎。

外語高速組

“Whendoesthewristwatchstrapshopshut?Doesthewristwatchstrapshopshutdownsoon?WhichwristwatchstrapsareSwisswristwatchstraps?”

衞詩挑戰
Jill一睇到咁繞口嘅英文急口令,本來面有難色,點知到正式挑戰,7秒搞掂!完全無𦧲脷,平時快歌唱得多,日子有功,醒!

黃長興挑戰
Stephen講得都算流利,可惜比衞詩慢兩秒。佢話喺法國都有玩法文急口令,不過次次都慢人幾拍,識得法文不妨試吓讀:「Unchasseursachantchassesdoittoujourssavoirchassesanssonchien.」(解釋:一個好的獵人打獵不需要獵狗。)

朱薰正音功

教人講正音講到出咗本《正音功》嘅DJ朱薰話:「初初講急口令唔好貪快,未讀清楚個字已經胡混過去,實唔掂!要慢慢讀清楚個尾音,唔好每個字讀一半就算。」朱薰話大學時期已經要不停練講:「韓國航空食鴨胸」,要讀正音,秘訣係要讀畀人聽:「讀懶音嘅人自己聽唔出,所以要兩個人一齊練,互相幫助先得。」聽到未?快啲捉個Friend練習以下急口令啦──「你想做各行各業定係留喺田度割韓國葉,割埋各種粉葛,割粉葛記得睇準個角度,因為各種粉葛嘅角度都唔同㗎喎。」我試玩過,真係好難!

街訪

咪以為時下年輕人口齒不清,其實啲中學生鬼咁牙尖嘴利,廣東話急口令已經挑戰唔到佢哋,要玩普通話急口令。

Mika挑戰:「扁擔寬、板凳長,扁擔想綁在板凳上,板凳不讓扁擔綁在板凳上,扁擔偏要綁在板凳上,板凳偏偏不讓扁擔綁在那板凳上。」(節錄自台灣組合S.H.E.歌曲《中國話》)

Priscilla挑戰:「去街市買魚腸,見到姨丈,放低魚腸,問候姨丈,執番魚腸,拜拜姨丈。」

Natalie挑戰:「潘宏彬、祝文君去搬雲吞,祝文君跟潘宏彬去橫濱,潘宏彬同祝文君一齊去紋身。」

鄒小姐挑戰:「圓圓遠遠叫圓月,叫來圓月來賞月……」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載