蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年02月25日
馬上成為壹會員

Facebook李八方 反思樂壇Kai中物

懶理外界批評,樂壇頒獎禮照舊太公分豬肉。畸形生態,好歌未必有好報,相反近年爛歌當道,一班「惜歌八十後」決定化身另類李八方,近日開Facebook群組嚴選年度Kai歌爛詞,以專業點評,捍衞耳朵,鞭策樂壇!

記者:蔡俊業
攝影:梁細權
場地:Kapok(灣仔日街3號/25200114)

「90後」KaiSongsKaiAd

打開Facebook,發現此Group於1月尾開始運作。觀乎Wall上盡是YouTube連結,隨便Click一兩首看看,便知所言非虛,雲集樂壇「Kai中物」。如此有趣,原來創辦人「KaiSongsKaiAd」竟是「90後」,只有18歲,怪不得。誰知後來才發現,這位仁兄是李八方啲Friend,即一班人以同一署名發表意見,Ricky、Joyce和Stephen就是骨幹成員。
至於「Kai」一字,源於國語「凱子」或「獃」。記者首次在媒體聽見,是在杜Sir的《以和為貴》中,Jimmy仔(古天樂飾)向飛機(張家輝飾)在私家車廂中說:「你唔好咁Kai啦!」字幕卻寫成「你別太天真!」後來蘇真真於《香港潮語學習字卡》中,將「Kai」定義為「儍的、愚昧的、呆笨的」,「確立」它的語文地位。

網址: http://www.facebook.com/group.php?gid=282271544449&ref=ts

嚴選五大經典
第1位《友誼的光彩》張如城

Stephen點評:「2008年一首張如城《友誼的光彩》已經夠照,詞好舞蹈好人又靚仔!」真的YouAreMyPride!

第2位《搭錯車》裕美

Kai歌詞:「Woo~Yamete!Yamete!搭錯車/以為他很好可惜擁抱只能暫借/愛到Yamete!Yamete!怕轉車」

Ricky點評:「唔好因歌者有日本血統,就夾硬堆入歌詞!」高皓正還是好好做其新郎不要填詞。

第3位《火》謝文雅

Kai歌詞:「多火/這個女生願望很多/夢見蜘蛛俠的胳膊/問她有沒有飛過/問她去不去大漠」

Ricky點評:「絕對是神級Kai歌!」尤其是她跳舞似瑜伽。

第4位《UpandDown》鄭希怡

Kai歌詞:「嫌棄你每天太刻板/最怕活得平凡/懶理太多麻煩/ABCD跟我玩」

Ricky點評:「不停用上海話Rap,好想笑,我聽了至少30次。」難怪Yumiko常成為網上投票「難聽歌手」。

第5位《一字馬》林保怡

Kai歌詞:「男人心一字馬/讓女人心擔驚受怕/男人不一字馬/讓女人艷麗也暗啞」

Stephen點評:「如果邊個讀過高深嘅中文,可唔可以話我知點解『男人心可以一字馬』?」周禮茂認真老貓燒鬚。

群組09年五強賽果預測

現時群組還在搜羅2009年的Kai歌,稍後作公開投票,以下是專業預測的年度五強作品!

《血拼》徐子珊

Kai歌詞:「(名模OL空姐政客)YouWouldn'tUnderstand」

《Go!爭鞋》鄭融

Kai歌詞:「名牌唔名牌/要買趁快買/球鞋和凉鞋/就讓我縱壞」

《比武招親》范萱蔚

Kai歌詞:「隨隨便便無眼光/離離合合無嫁妝」

《羅茲威爾》王梓軒

Kai歌詞:「我玩到失憶/玩到失眠/寫信回鄉/去麥田圈留一留言/點解周圍只有油田/搵唔到麥田」

《周星呢》古巨基

Kai歌詞:「算罷啦/六師弟你點會覺得害怕/冇夢想/只會似條鹹魚/你識廣東話精嘅就聽住喇!」

獨樂樂不若與眾

談到「面書」此Group的起源,素來留意流行音樂文化的Ricky是始作俑者。「嗰陣仲喺大學讀緊書,成班Friend住Hall,留意到夜晚電視台音樂節目播嘅MV,有次睇到謝文雅小姐嘅《火》,真係火都嚟埋!」咁激動,所為何事?「首歌嘅Melody係印度Intro,先唱廣東話再唱國語,嗰下我想問首歌想表達咩?想唱咩?」小記登上YouTube重溫,發現這首歌的舞蹈極為騎呢,像在螢幕前玩瑜伽,歌詞亦難以理解,難怪Ricky說:「我完全呆晒,O晒嘴!」
於是,他四處向人分享,「同朋友講,先知原來佢哋都有聽呢首歌,大家都有共鳴,於是開始喺自己Xanga揀一啲爛歌。」他坦言當初只是玩票性質,後來支持者越來越多,「好似好多人都覺得香港啲歌越來越Kai,與其獨樂樂不如眾樂樂,舊年開始搞投票。」他讓網友票選2008年度30首Kai歌,又邀請身邊「嗜Kai」的朋友當專業評審,Joyce和Stephen等便在受邀之列。「之後又有朋友話不如搞大啲,於是決定喺Facebook開個Group,一齊反思吓點解啲歌搞成咁!」「我♥Kai歌Kai廣告」便正式於Facebook出現,截稿前有163名會員。

聽了30次張如城

Kai歌總選是群組的王牌節目,既然選Kai歌,就不得不問句何謂「Kai」?他們的定義卻稍有不同,Kai歌泛指歌曲內容反智、不合常理、難以理解……一首歌能否成為「Kai中物」,歌詞是關鍵。他們隨時能夠援引例子解釋,Stephen以李蘊的《十五十六…十七》為例:「佢用排比句作修辭,『今晚戀上管弦/聽晚戀上側田』,仲有一句『鄭中基/普多斯基/柴可夫斯基/無賴型/活力型/定係溫柔型』都是令人無法理解!」Ricky猶有「餘悸」:「因為要畀分,老實講真係聽咗好多次,好難受!」「我聽了張如城30次!」當問到Joyce聽得最多最反胃的Kai歌是哪一首時,她便說絕對是城城於北京奧運期間推出的《友誼的光彩》,「一講,我個腦又不停浮緊啲歌出嚟,喺度Together緊!」噢,SorrySorry,只會問呢一次。

量產化是元凶

Ricky指出,這個群組成立的背後,不是一味搞笑,而是對香港樂壇投下失望一票,他認為,這是和本地樂壇近來過份量產化,致使Kai歌氾濫的元凶。「唱片公司谷一個新人,咩都量產化,一年可能要出幾張EP然後推出新歌加精選,填詞人又為趕Deadline堆砌歌詞。」至於太多「歌手」在公司政策下,根本訓練未夠便要速速出唱片賺錢也是原因,「好似TVB嗰啲,徐子珊、黃宗澤掛住拍劇。」Ricky續說:「唔係一定要首首歌都用『風吹我的衣襟』(依然)用詞用到好靚,但你唔好粗製濫造,Hea我哋!」

後記:會考遇上張如城?

因要寫這條稿,我鼓起勇氣在公司打開YouTube第一次聽《友誼的光彩》,實在忍唔到笑!但論驚心,以下一則Twitter網友的分享更震撼:「當日考公開試Listening,開考前RTHK就係播呢首歌,當時嗰位DJ話幫我哋定驚,但我完全唔認同!」嗰名DJ擺明靠害,佢話當時只係要忍笑忍得好辛苦,而考完試後,「大家唔係討論試題,而係講緊呢首歌!」

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載