蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年08月06日

代Cult2:八十前
老師傅紮足70年

紙紮,原來不只是燒給先人的用品,以前,紙紮還包括燈籠、佈置、宣傳品,師傅們幾乎年中無休,長做長有。可惜近年內地紙紮興起和需求下降,老師傅買少見少,不過縱苟延殘喘,他們還是堅持靠一對巧手,把紙紮行業延續下去。

記者:林佩婷
攝影:陳盛臣、王文忠、部份相片由受訪者提供

有食無工睇住學

中環伊利近街「秋記紮作」的陳桂洲,1935年從清遠來港投靠做紙紮的舅父,自此一做七十年,92歲高齡的他,現在每日在奪命斜路上上落落開舖,依然健步如飛。「當年為吃飽飯,有乜做乜,」他憶述:「喺鄉下無嘢做諗住落嚟黐餐,我無乜文化好難搵工,唔係做飛髮佬、裁縫就係做紙紮。喺舅父間紙紮店做嘢有食無工,一味送貨,食飽飯咪睇住學囉,唔夠年幾開始落手落腳做,有嗰樣做嗰樣,當時最流行紮對幡,唔使兩三年就做師傅。」
學滿師幾年後,陳伯跳槽另一間規模較大的紙紮店,不過即使有穩定人工,他也只喜歡做散工。「因為我懶,所以決定打散工,斷日計糧,幾乎全港九紙紮舖我都做過。成日三更半夜開工,以前好多死人生意做,財主佬差唔多死之前就開始紮,每次做足七七四十九日,嗰個年頭根本唔憂做,日日有工做,戰前每日人工約$1,戰後十幾廿蚊都有。」和平後,舅父的紙紮店無人繼承,陳伯正式接手。中國人始終較迷信,做紙紮怕不怕鬼?「係人都會死,驚得幾多?」他說:「做紙紮有乜好驚?咁做死人化妝嗰啲又點?我最驚就係做得唔似,好似龍鳳、飛禽走獸等多彎位嘅紙紮,工序麻煩啲。」

日本Fans經常探望

除先人紙紮品,每逢八月十五的花燈、農曆七月鬼節的鬼王公仔、農曆新年甚至大型廟宇的佈置等,統統需要紙紮品,陳伯手工之精細,連外國人都慕名而來。「我紮嘢從來唔使圖紙或相片,紮紮吓就得o架喇,好似鬼王、判官,個個十幾尺高,一樣係咁紮,八月十五紮走馬燈,好多人鍾意燈裏面嘅七俠五義公仔。」最滿意作品是甚麼?「工展會叫我紮個聖誕老人擺門口!其實唔單止本地人,廿年前有個外國女人拎張相畀我,話佢隻狗死咗,叫我紮隻一模一樣嘅臘腸狗畀佢燒,跑馬地同尖沙嘴印度商會每年都會叫我紮印度神。我間舖雖然細,但好多人成日入舖搵我傾偈,有個日本人識講廣東話,成日探我。」現時仍有不少廣告公司拿圖紙請陳伯紮作,甚至要求紮日本漫畫角色,不過要求多多太麻煩的話,他都會拒絕。
香港紙紮品需求不斷減少,加上近年大陸紙紮品入口,陳伯慨嘆生意今非昔比,「每年中秋,我都會紮大眼肥金魚,論人工、手工、外形贏晒,但大陸貨夠平,我邊有得做?有人問過我收唔收徒弟,我話費事害人唔收,我六個仔女都無做呢行。我唔怕呢行失傳,其實只要拎起支竹,自己紮紮吓都紮得出,以前受邀教學生紮飛機,個個學生都紮得到,咁即係唔難啦,眼見功夫啫。」

陳伯巧手

1. 自己手紮的燈籠會放入店,好與店外的大陸貨區分,大眼肥金魚三日起貨,賣$600,中秋最搶手。

2. 中秋節,陳伯會幫酒樓紮燈籠,每次大批大批地紮。

3. 盂蘭節,他替街坊會做「大醮」,製作十多呎高鬼王、城隍土地等公仔,「以前收千幾蚊,家收萬幾,升幅唔大。」

4. 陳伯另一項絕活走馬燈,長做長有。

5. 「以前財主佬打齋七七四十九日,燒到無嘢好燒,就整埋佛塔佛船,」船身的字出自陳伯手筆:「家啲人,紮船紮到好似隻艇咁。」

6. 香港印度商會,每年都找陳伯紮象人神。

7. 幾十年來黃大仙的「打醮」(佈置)都交由他打理,近年管理層轉變,再無聯絡。

8. 盂蘭節要紮黑白無常、財神、城隍、判官和土地的擺設品,還要紮好地台,好平穩地放在斜路。

9. 這些圖案是以前貼在燈籠的花款,現在幾乎絕迹。

秋記扎作(25228808)
中環伊利近街14號E地舖

金玉樓≠酒樓

歐陽偉坤師傅,18歲隻身來港,當時難找工作,入行紙紮還得靠朋友介紹,即見工即上班,最搞笑是他最初根本不知見甚麼工,「朋友叫我去金玉樓見工,聽個名以為係酒樓,第二日去見工先知係紙紮店,不過無計喇,嗰陣好難搵工,乜都要做。最初執頭執尾、掃地倒痰盂,自己望住人點做,識啲唔識啲。四年後,咁啱阿叔喺紅磡寶其利街間舖有個細地方,話分租畀我,咁我咪將儲埋啲錢拎出嚟一博,開咗『寶華扎作』,為咗搵生意,我自己去佛堂、長生店、酒樓等地方做聯絡。」六十年代他遷店,搬往深水埗黃竹街,再輾轉搬至現址福榮街。
五六十年代,紮得最多是祭品,其次是燈飾廣告,「好多舖頭都鍾意訂細燈籠,放喺門口掛宣傳字句,好似大減價咁,當年真係好流行。到咗六十年代,連外國華僑都好興掛燈籠、獅頭龍鳳,我為咗做埋呢筆生意,特登申請綜合來源證,有綜合來源證先至可以出口去美國,但個證規定唔可以用大陸物料,我自己搵料都搞咗好耐。嗰陣一碗魚蛋粉三毫子,一個燈籠賣到幾十蚊,仲未計紮嗰啲獅頭、金龍,當時趕十日起一件貨,可以話最好生意。」

環保影響生意

當時紙紮行業相當興旺,歐陽師傅做到無停手,中秋節要幫餅家紮會響會動的公仔,猶如現時聖誕燈飾,甚至連片場道具都做埋。可惜環保意識日漸抬頭,令紙紮品銷量大受打擊,「自從講環保,生意差咗好多,黃大仙廟以前香火鼎盛,大把嘢紮嚟燒,家陣唔燒得元寶!以前我紮作為主,家就變咗賣香,老師傅又好多過咗身,有工做都請唔到人。舊式紮作好多都失傳喇,家成日搵我做舊時紮作品嘅,咪係文化博物館囉。」

歐陽師傅巧手

10-13.當年紙紮品好多元化,陰宅、飛機、汽車甚至連中國人至愛的麻雀枱都有。

14.做一個獅頭十日起貨,當年長做長有。時至今日,港價手工要八九千,內地只需二三千,哪夠人競爭?

15.六幾年中環景福珠寶首日開張,門口三個大型燈籠,由歐陽師傅所製。

16. 1963年在三藩市賣廣告,宣傳出口紮作,發黃剪報留存至今。

寶華扎作(27769171)
深水埗福榮街2C

冥鈔貶值?

不說不知,除手作紙紮品外,其他燒衣用品也有很大轉變,如冥鈔,以前地府冥通銀行一間獨大,現在多了冥都和天地銀行,印刷比前精美更似真人用的紙幣,色彩更艷麗,但奇怪的是面額小了,以前動輒十幾個零跟尾,現在的天地銀行竟然有一百元冥鈔,大抵地府沒有通貨膨脹這回事。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載