› 選擇地區
三藩市
紐約
洛杉磯
其他美國地區
香港 台灣 北美
 
2011年03月21日

爆Like:沙灘熱身 埋牙肉搏攬欖

日本地震新聞日日播,睇得多以為末日就到,心情鬱悶。於是上周末趁3.19SuperMoon來到淺水灣,眼見沙灘上惡鬥連連!放心,唔係月亮作怪,而是一連兩天舉行的香港首屆沙灘五人欖球賽。雖然天陰、有雨,遇見比堅尼正妹好夢成空,惟有直擊參賽者埋身肉搏攬欖止癮吧!

記者:蔡俊業
攝影:梁細權、林栢鈞

天有不測風雲

陽光與海灘,從來一不離二,豈料採訪「香港沙灘五人欖球賽」(HongKongBeachFives)前幾天冷鋒來襲,氣溫驟降不特止,還要天陰有雨,搞到我勁驚比賽當日「落狗屎」。雖然最終沒有雨,但依然低溫,寒風下,青春少艾們又怎會穿比堅尼?事實上,就連負責籌辦今次賽事的TCOB總監AlexBrazendale亦慨嘆天有不測風雲,「天氣真係無人控制到,今朝(周六)早仲有落雨,但打Rugby其實係講氣氛,所以無論天晴定係天陰都係現場氣氛要緊。」曾到過大球場睇Sevens,如果要比氣氛,淺水灣這邊當然無得比:人家一邊聽勁歌一邊跳舞,觀眾奇裝異服扮鬼扮馬,甚至闖破防線落場(裸)跑,平台上酒杯碰酒杯,觀眾席則膊頭碰膊頭玩人浪,完場更會放煙花;相反今次大會原意將淺水灣變成嘉年華,有啤酒飲,有攤位玩,又有小欖球及吹氣棒等紀念品送,連大喇叭都在播BrunoMars和JustinBieber的歌,營造氣氛的條件有了,但冷風一吹,感覺仍大打折扣。計我話如果在炎夏舉行,效果可能更High!可是Alex說揀三月,主要因為配合另外兩個大型比賽。

五欖十欖再七欖

欖球迷應知道,這星期香港Rugby界最為忙碌、熱鬧,事關短短九日內三個大型欖球比賽連番登場,包括周三及周四(23/3及24/3)在跑馬地舉行的「香港十人欖球賽」(HongKongTens);緊接就是周五(25/3)於大球場揭幕,撲飛難過買iPad2的「香港國際七人欖球賽」(HongKongSevens);而三賽之頭炮就是「沙灘五欖」。個人經驗,「十欖」、「七欖」見得多,就連「小童欖球賽」都去過,奇就奇在未聽過有「五欖」,還要踩泥沙,是否屬香港獨家的全新Crossover?當然不。其實沙灘欖球在歐洲歷史不短,源自意大利東北的ForumIuliiRugbyClub於2001年始創「InternationalBeachRugbyCup」;英國「BeachRugbyWales」今年亦來到第六屆;連鄰近的新加坡及台灣早有沙灘欖球隊。
來港十年,生於新西蘭的SemiLafeta是欖球迷,去年開設視頻網站RugbyAsiaChannel,專門報道本地欖球新聞,他指近年欖球在港日趨普及,「如果真係要推廣Rugby,首先就要話畀大眾知道佢嘅有趣一面,令到大眾享受同朋友睇比賽嘅時刻!」與Alex共事、將於周五代表香港出戰Sevens的基夫(KeithRobertson)則認為,國際七欖和沙灘欖球比賽,形式和目標上分別頗大,「前者是讓世界各地派出最強球手去爭奪獎項,相反在沙灘上打欖球感覺就較為隨意。同埋今次呢個比賽,市民可以免費入場,相對國際七人欖球賽要畀錢買飛,我覺得今次比賽更加能夠畀市民知道咩嘢係欖球,對於推廣呢項運動絕對係好事!」

期待明年風光無限

話雖如此,推廣繫於宣傳,就算宣傳也未必能夠立即見到成效。今次有份組隊,以「Taice」隊名參加女子組的Macy,大約四年前因朋友介紹而開始接觸欖球,她說直到現在依然有很多人對欖球一知半解,「一聽見打Rugby就覺得好恐怖、好痛,『我咁斯文唔會玩啦!』咁樣,但其實欖球都可以好斯文嘅!」而Macy當年正是因其好友阿Wing介紹而加入打欖球行列,她認為近幾年香港欖總加強了宣傳,又在中學招攬年輕人,港人對欖球認識已比以前好得多,只是她認為今次宣傳明顯不足。旁邊的Macy點頭認同,「如果我唔係Like咗AirAsia的facebook,都唔知有今次活動,平時都唔係好見到有廣告宣傳。」畢竟都是第一次舉辦,作為籌辦單位,Alex直言宣傳力度往往和贊助費有關,「當你去搞一個Tournament,有越大筆預算就能夠做到越多嘢。當然今次係第一次搞,所以總有好多改善空間。」他說明年會堅持續辦「沙灘五欖」,我就希望,明年今日,陽光再現,欖球場四周,比堅尼妹風光無限。

BeachFives直擊

沙灘嘉年華

Tackle連環拍

Tackle是其中一種打欖球技巧,當球員遭敵方碰撞時跌倒,球員必須立即放低欖球,讓其他人去搶。

國際七欖vs沙灘五欖

到底沙灘打欖球與草地賽相比有何分別呢?基夫介紹說:「喺沙灘上面好難企得穩,跑就更加難,所以比喺草地上面打體力消耗更大。所以打沙欖比賽時間較短,而且比賽場地亦都較細。」大會資料顯示,淺水灣的場地面積為30米×20米,約為國際七欖場地的一半面積(七欖在大球場打,面積相等於草地足球場)。在大球場跑到索氣,在沙地上走也不見得易捱,很多球員比賽完畢後,都攰到在廣告板旁躺下休息。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載