蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月13日

喜愛夜蒲4:度橋私拍 深夜惡搞

早前《華爾街日報》引用美國一份關於Body Clock的研究報告,說人體在不同時間適合做不同的事,尤其晚上九點過後,人累極,大腦放鬆了創作成效更佳。去年聖誕成立的香港互聯網創作及藝人協會(HKICAA),集合一班自稱愛玩愛無聊愛分享的創作人,不時上載惡搞歌曲影片寸盡香港,團員在網界個個響朵!呢班友仔晚晚半夜才來度橋,日頭仲要返工返學,人體時鐘查實早已亂晒龍。 記者:陳慧敏 攝影:周旭文

1. 司徒夾帶:真名陳學鳴,正職UMOVIE負責人兼創作總監,以「司徒夾帶」身份寸盡港人港事。

2. 窮飛龍:真名陳歷恒,現職作曲、作詞人及唱片監製,曾出版《直到你惡搞我》一書及CD,惡搞了大量時代曲唱盡時弊,今年有送給學民思潮的原創歌曲《思潮作動》。

3. 黃俊熙(Hay):初期以入廚系列《Cooking Hay Hay》爆紅網絡,還有短片如《髮線新聞》和近期的《Hay生存遊戲——大廈逃殺》等,點擊率幾十萬計!現職UMOVIE創作總監。

4. Ody(梁健文):正職製片業之攝影師、剪接師。

5. 薑檸樂:真名蕭慶峰,現任MAJI TV Creative Writer。

何解不回家?

深夜,觀塘的工廈靜蠅蠅,走廊未見人影,卻不時傳出微弱的音樂聲。除有食肆、創作小店進駐,夜裏的工廈夠靜,因而成了一班創作人避靜之地,在這裏開錄音室的窮飛龍,大部份創作靈感都在這空洞的靜裏鑽出來。還招呼了一班HKICAA盟友深夜上來吹水度橋,吹到凌晨兩三點,幾許拍攝意念就這樣吹了出來。

深夜底褲驚魂

為興趣挨更抵夜,辛苦,但快樂。眼瞓、被保安驅趕、返工無精神濕濕碎,還有些「深夜奇遇」,Hay便遇過變態佬攞住條底褲叫他幫手着,不過最驚的反而是「自己嚇自己」。Hay早前拍攝一段小丑殺人短片,地點在他家後樓梯,現在每次回家都有陰影:「凝住樓梯會有嘢彈出嚟,會有變態佬伏喺度,驚足一個禮拜!」而習慣通頂的窮飛龍,之前的工作室在「大酒店」雲集的紅磡:「見過張大班椅自己好慢咁轉270°,走去篤吓佢,張椅轉快咗,但90°左右就自己停咗!又試過凌晨四點離開紅磡車站,車站停車場無人,但聽到有BB仔喊聲!」 「去睇吓呀嘛。」司徒夾帶冷靜道。窮飛龍:「嗰個時間好多靈車,走啦,仲睇!」

創作由模仿開始

早前立法會差點通過的《版權修訂條例》,引起惡搞界同二次創作人的抗議。身為其中一份子的窮飛龍:「其實學習都係由模仿開始,(二次創作)係個好好嘅練習機會。香港教育或政府都唔鼓吹創作,你見今日韓國啲拍攝幾咁厲害,政府係有畀錢去推動,提供技術上支援,而我哋嘅電影、音樂同電視,家已遠遠落後於外地。比較出色少少嘅就係網上創作,好多人識網絡藝人多過啲新晉歌手,你就睇到個影響力幾咁大。你完全將佢禁咗,佢哋(在座各人)就唔會出現啦!」創作人當然重視知識產權,但若條例取不到平衡,或會令原作和惡搞界都兩敗俱傷。試想,《歡樂今宵》盧海鵬唱紅幾多經典,今日江南Style得二三四五六次創作而大紅,陳奕迅亦唔怕唱番小克惡搞的《一枝得啩》(陳奕迅《一絲不卦》搞笑版),林一峰還專登開放自己的歌,歡迎惡搞或二次創作,如此才能百鳥爭鳴。

手機拍片等日落

版權條例暫且睇佢點搞,Hay和Ody倒認為場地和資源才是當前最大問題:「例如我哋想喺旺角取景,你都知家旺角人多到呢,有時想好似外國啲片咁拍到好靚,但係啲景全部有人嘅!惟有去偏僻地方,等日落後人少啲先拍,咁即係夜晚啦,咁燈光、人手都要配合。」問題還有:「窮啦,我拍嘢都係用手機、相機仔咋。」薑檸樂說。

你cheap cheap哋喎

窮飛龍的壓力則來自親朋們:「好似之前幫Lou記(曾拍片惡搞iPhone 5、6、7)拍Gangnam Style,親朋問拍完無錢收嗰喎,佢哋覺得咁拍嚟做乜?」圈外人的理想化或質疑(以為好Hea好賺或虛榮),在座人都聽慣,但同行的標籤才激死人:「唱片公司覺得你寫開口語,cheap cheap哋喎,我搵我啲歌手去唱你啲歌,咪我啲歌手都cheap cheap哋囉!」喂,寫流行歌可用另一個身份㗎喎,而且若非Wyman林夕或莊冬昕之流,聽眾鬼得閒追尋作者屬誰!「佢哋(唱片公司)知嘛!我估唔到做二次創作都會有人咁樣睇。要講音樂人辛酸史,真係有排講!」而少唱別人的歌、多為抽水的司徒夾帶則無有怕:「最驚香港冇新聞,但睇嚟唔會,仲只會越來越多離譜新聞,唔會冇題材。」喂,咁咪仲大鑊……

度橋勝地

1.窮飛龍的工廈錄音室:工廠大廈夠靜,夜晚無人,隔籬雖則是Band 房,但牆身厚,隔音設備又足,啱晒。度橋,屋企唔得咩?窮飛龍:「屋企人一見你夜晚唔瞓就嘈,最長試過整整一個禮拜唔返屋企,24小時都喺工作室。」

2.深夜的公園:夠靜,先至諗到嘢!Hay話:「慣咗一星期有一兩晚差不多天光先返屋企,最主要係大家要11點幾先可以聚埋傾想拍啲乜,傾偈傾到兩三點先係戲肉!年幾前試過喺長洲拍咗三日兩夜,有一幕拍凌晨五六點日出,捕捉日出個吓個天藍藍哋嘅光,成晚冇瞓,第二日返屋企冲個凉就返工!」嚟緊將有一系列於深夜拍攝的短片,遲下,瞓得仲少!

近期作品

司徒夾帶「閉關」前有送給港人的《前途之歌》,商場ABCD,令人感觸良多。

睇佢惡搞!

眾人作品見於UMOVIE、YouTube、Goyeah等網路渠道,也可於HKICAA找到: http://www.facebook.com/HKICAA.com.hk

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載