蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年12月08日

紙醉甘迷2:指過紙癮

Percy手指很靈活,拿起剪刀剪剪剪,也夠自娛半天。沒有緣起,她的紙癮始自五歲,當其他孩子沉迷芭比時,她見到靚紙就想買,她說:「儲埋儲埋啲靚紙,耐唔耐就拎番出嚟欣賞,反而覺得用靚紙包禮物好浪費。」
記者:陳慧敏 攝影:周旭文

愛紙一見鍾情

為何愛上Bookbinding(書皮裝釘工藝)?香港唯一一個Bookbinding藝術家Percy在網上透露:「就好似你愛上一個人一樣,沒有理由。Bookbinding對我而言也是如此,那是一見鍾情吧。」考AL時,考試要求學生選一種喜歡的題目做資料搜集,她選擇寫紙,於是她由紙的來源、造法、故事、用途等統統都人肉起底,連讀大學時都學造紙,然後萬劫不復,染上紙癮。當年她哥哥訂婚,Percy為他剪了張恭賀語貼上面書以示祝賀,想不到引來掌聲連連,人人叫她剪這剪那,就如此這般,漸漸發展到現在開班授徒、辦展覽、開講座,成為一個紙藝術家。
念大學時,她用牛仔褲造出人生第一張紙:「我剪碎一條舊牛仔褲,用水煮了三小時,將殘留喺牛仔褲上面嘅洗衣粉、染色素等等化學物質煮淨,煮到一煲都係泡。」牛仔褲變成紙後,她將之染成粉藍色,紙表面還看到還未打磨細滑的碎布屍骸。在她的儲紙庫內,還有用水松造成的紙、埃及人用稻子造成的紙,林林種種造紙法也很多,如把青瓜排開,曬乾了又是紙,厲害厲害!是否甚麼都可變成紙?Percy:「都唔係,要選有纖維嘅物質,如果用西芹,就要抽出中間嘅絲先能夠造紙。」至於剪紙小貼士,她這樣教路──先用牛油紙起稿,然後蓋在選好的紙上固定,再用筆刀慢慢刻。刻時要由小至大,先刻微小、零碎的小洞洞,才刻大面積的外圍部份,這樣才較好控制。

還原修復舊書皮

大學畢業後,Percy跑到美國學初級Bookbinding技術,之後幾次出遊,目的都為見識各地Bookbinding及造紙技術。今年二月,她專誠跟紐約一班造紙業者,跑到緬甸學習流傳百年的傳統造紙技藝,「緬甸仲有好多小家族式金箔工房,都有超過一百年歷史,佢哋仍然用人手,手執三公斤重鐵鎚揼六個半鐘頭,將一克黃金慢慢揼成一百張金箔,俾男信徒貼喺佛像塊面,以示忠誠。」那些隔在金箔與金箔之間的薄紙、承托金箔的硬卡紙,又來自不同的村落。「用嚟托住金箔嘅卡紙,居然係用竹造嘅,竹要先浸泡三年,將纖維浸軟,再用熱水煲三日,之後再曬乾,先可以開始打磨再造成紙。家用機器打磨竹嘅纖維都要八個鐘,當年緬甸人用嘅係鎚仔,你話係幾咁漫長嘅一個工序?」她偷師的如意算盤打不響了,「本來諗住一學完就返香港試造,但三年喎!點造呢?仲有呀,造紙會搞到成地水,無可以好好去水嘅場地好難搞,香港天氣又潮濕,連曬乾張紙都難,喺香港造紙似乎唔係咁易。」
造紙問題未解決,十月,她跑到美國American Academy of Bookbinding,跟著名Booking Binding設計師Monique Lallier旗下的工藝技術員,學習製作皮革書皮的Contemporary finishing technique,「Bookbinding可以分三大類,包括即用嚟作厚皮收藏書用嘅Book art、用嚟展示藝術作品用嘅Fine binding、維修舊書用嘅Restoration。呢個係近二三十年興起的技藝,幾塊皮,高度同大小都要拼到同封面剛剛好一樣,唔能夠有一點點瑕疵。」 剪紙與釘裝,只要有剪刀膠水與紙,已然成事,但要做得好,卻需要專心與細心:「我可以一日八個鐘不停剪紙或者釘裝,有時埋首搞足幾個鐘,起身飲水或落街,會有啲頭暈。」來跟她學剪紙與釘裝書的人不少,試過有個男孩來學剪紙,設計圖上有些層層緊扣的小圈圈,刻到喊。
在這個「舊不去新不來」的社會,書爛了,買過,就是這麼簡單,維修反而是奢侈事。「試過有人拎本1881年出版嘅家傳之書畀我重修,書皮剝落晒,如果拎去商業釘裝店,應該會幫佢重新造一個新書皮,我就幫佢補好啲窿窿,將舊書皮盡量還原番本來個樣。」沒其他店舖或師傅願意修復舊書?Percy:「全港大概淨係得我肯做啩?」雖不中亦不遠矣,因為全港只有她對紙這麼癡。

Percy So

地址:銅鑼灣勿地臣街12號6樓(頂層)
電話:9191 4687 
網頁: http://www.percyso.com/

做傳遞送撕紙作品

敏叔的撕紙藝術源起自1983年,那年年卅晚他回鄉探親,用寫揮春剩下的紅紙裁成正方形,對角摺起,撕了一張大吉:「嗰個年代喺香港買掛曆返鄉下,一定貼喺屋企最靚位置,屋企人見我個大吉撕得靚,就拎走掛曆改貼大吉。」六年後,敏叔在香港做傳遞,每日揹着大袋交收信件周街走,雖辛苦但開心,「因為我奉送作品畀寫字樓,寫字樓貼滿我嘅作品。有時我搭巴士撕紙,好多乘客掛住睇,過咗站唔記得落車。」其後他做義工、教班、做訪問,請假多了老闆不喜歡,他自己也覺得不好意思,就辭工。跟太太離婚後,他某日孤身一人來到九龍城寨公園,見有外國人在遊覽,就手痕撕些紙送給他們,這吸引到公園早期的導賞員注意,幫他拿報名表,報名到尖沙嘴文化中心的藝墟擺攤。敏叔:「如果無城寨公園,撕紙藝術都唔知何年何日先有面對廣大群眾嘅一日,所以我撕咗『無言感激』四個字送畀公園。」

絕活一心三用

敏叔在番禺鄉下長大,五十年代,想找張紙都難,「嗰陣邊有勞作堂㗎,一本教科書都代代相傳,就算1958年後我落香港讀中學,啲教科書都唔會成日改版搵家長同學生笨!你睇家啲教科書幾大隻字?即係頁數好多啦。」如何練出無敵指力?「啲人成日問我點練指力,我話我朝朝飲茶,用食指同拇指洗杯練番嚟嘅。」這答案好假!「係呀,你服唔服吖?咁你唔會用其他三隻手指洗碗洗杯吖嘛。」
訪問時,敏叔手執廢紙在摺摺撕撕,眼睛望着我,久不久又向來公園參觀的遊人和外國人,又中又英地講解公園歷史。邊說邊撕,攤開手中紙,已經是個緊扣的奧運五環。敏叔:「我可以一心三用,我手撕緊紙,口講緊嘢,對眼可以睇晒全場,我都希望訓練到學生一心二用。」為何弄得自己如此繁忙?「無嘅,我希望令自己忙,時間易打發啲吖嘛,咁肯定無多餘時間諗嘢,一有多餘時間諗嘢,諗嘅肯定係無謂嘢,分分鐘仲要係解決唔到嘅嘢。」想看敏叔手藝?今天(12:00nn至6:00pm)可到太古坊糖廠街,那裏正舉辦「太古坊四十周年Street Party」,到時可免費欣賞他的撕紙絕活。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載