› 選擇地區
三藩市
紐約
洛杉磯
其他美國地區
香港 台灣 北美
 
2012年12月22日

繼續聖誕2:弦外知音

雖然一年只聽一個月,但當你走出街道周圍都聽到那Loop了幾十年的罐頭聖誕歌,似Shopping催命符。60年代的香港人覺得「英文歌比較型」,所以多數翻唱英文聖誕歌,而近年那些新派聖誕歌,多講情愛失戀,同大時大節又唔係好夾。忽然好懷念細個時的廣東話老翻歌《耶穌娶老婆》,雖無聊,但勁親切。但再摷番就發現香港歷年都有不少改編的粵語聖誕歌,飛甩罐頭,不如一齊來聽聽。
記者:陳慧敏 攝影: 陳永威 、部份為網上圖片

模特兒:Debby & Jan @Pure Models

學友陪你過聖誕

7點,西洋菜街變成行人專用區,各路樂隊同表演者陸續出來擺陣,要聽現場演唱,西洋菜街最方便。Tony同Connie的SMS(Sing My Song)每晚總見圍上一圈圈的人潮。Tony中四開始看樂理書,自學玩結他,中五走去教結他。唔知大家記唔記得以前睇住歌譜,逐粒音為Nokia手機輸入鈴聲的日子嗎?Tony就是當年將Ring Tone變做數字,出埋曲譜的第一人。Tony:「2010年金融風暴,差不多輸晒全副身家。跟住就出來搵嘢做,但聽到我呢個年紀連見都唔想見。於是就來了西洋菜街唱歌,收入都可以餬口,仲比打份工好。」由沙田貪玩街頭賣唱唱到去星光大道,再來到旺角,也唱過酒廊,但他還是喜歡望住滿街觀眾,被觀眾認同的感覺:「有人問我鍾意響Lounge唱定係街頭唱,我毫不考慮就會揀響街頭唱。你響Lounge或某啲地方,入面啲人未必係聽歌,但企響條街度啲聽眾企得咁耐,七八成都係欣賞你音樂先至會響度,嗰種感覺係有錢都買唔到。」
唱了近十年,日日都有成排Fans跟住捧場,有住西環的,也有由星光大道時已跟住他的,晚晚跟到旺角來捧場。訪問之時一問起就大件事,Jacky:「我跟咗佢十年啦!落雨天時,我幫佢擔埋遮都要聽佢唱!」Andy嫂:「Tony唱歌把聲好似張學友!」每年聖誕他們除了傳統的聖誕歌外,Tony會唱陳奕迅的《Lonely Christmas》:「我都係鍾意唱傷感的歌,容易投入感情。其實我對首歌無乜感覺。或者今年會練唱最鍾意學友的幾首聖誕歌,同埋70、80年代的舊歌。」Sing My Song(SMS)逢星期一、二、三及星期日在西洋菜街表演,即是25、26號都在,到時更加會大唱聖誕歌,氣氛必定熱鬧,大家唔使再聽罐頭歌喇。

準過瑪雅預言 黃霑《香港'Xmas》

講起歷來最難忘的廣東聖誕歌,香港浸會大學創意文化系朱耀偉教授,跟香港著名樂評人黃志華都想起題材獨特的《香港'Xmas》,是由黃霑於1989年所推出的絕版碟。雖知那時是前瞻性的表現,到了23年後的今日再聽,配合時勢,簡直比瑪雅預言更靈驗。如有林振強填詞的《慈祥鵬過聖誕》、《皆因一經過六四》仲有首7歌連環的《每天聖誕》,包括改自《Santa Claus Is Coming To Town》叫你九七前玩咗先的《又到聖誕》:改自《Silent Night》的《跳啦老豆》今日唱來聲聲吮核又到肉,想笑時又覺得好陰公,七情六慾同現。

寂寞聖誕在唱歌

身為填詞人的黃志華,好記得同鍾意80年代達明一派《今天應該很高興》:「成首歌其實無話唱緊聖誕,但係描寫啲情景,同個MV都係聖誕節。」80年代是香港移民潮,十年間流失數以十萬計人才及大量資金。作詞人潘源良自己都說首歌「沒有一字說悲愁」,「香港歌詞研究小組」的曾卓然寫道「主題是親友全部移民,剩下「我」自己獨自過聖誕。」明明是「鬧市這天燈影串串 報章說 今天的姿彩媲美當天」,燈飾繁華都係由報章得知,即是無街去啦,再想起朋友「偉業」及「瑪麗」都身在國外生活美滿前程似錦,對住空洞Party房只有想起昔日人齊時光景,勁灰勁失落。

細味經典歌曲

題材獨特的還有郭富城的《戰場上的快樂聖誕》(1997)(小美填詞),朱耀偉:「一直以來聖誕歌主要都是情歌(失戀更易打動人),一時間想不到近年有甚麼推介,反而這歌取材獨特,印象較深。」咁愁?不如揀首輕輕鬆鬆的歌,振作吓士氣。黃志華笑不停地揀了上過兒歌金榜的《雪車可會取道青馬橋》。黃志華:「因為係我寫。哈哈哈。當年合唱團就搵我寫十多首聖誕歌用來出碟,剛好97年青馬大橋落成,我就寫咗呢首歌。」聖誕老人經青馬大橋來送禮物,簡簡單單,唔扮K-pop似番首兒歌,又有香港歷史特色,而且15年來周時都聽到,其實都算是一代經典喎!

其他簡單易學洗腦歌

十幾年前黃偉文填詞的Cookies《曲奇聖誕歌》,唱出聽「罐頭聖誕歌」,行街睇燈飾抽獎睇到厭,鋪排等老竇送禮物,是但執個男朋友過節,以及當代年輕人怕寂寞的心情。

去年李家仁醫生改編自《聖誕快樂》,洗腦式的《小明過聖誕》,是《小明系列》的首支聖誕歌。不過原來09年米雪都曾「開金口」,連同位同學仔組個「米雪、檸檬與橙」樂隊,甜甜的唱過一次。而李家仁醫生則在中間加了感性獨白,唱K的話,你未必學到。

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載