› 選擇地區
三藩市
紐約
洛杉磯
其他美國地區
香港 台灣 北美
 
2013年01月19日

嫁嫁嫁吧3:歷代炸彈人

西德中古印刷機,一小時可印三千多四千份喜帖,徐伯:「唏,𠵱家邊有咁多嘢印吖,有人訂先得㗎!」

炸彈呀!別扮嘢了,就算跟新人有多親近,喜帖叫得做紅色炸彈,還是會炸得你好肉赤。如果,信封裏抽出的喜帖好型好靚好搞鬼好有心思,令收帖人也笑逐顏開,人情,抵畀啦啩。
記者:陳慧敏 攝影:陳盛臣、陳慧敏

喜帖變遷

六七十年代燙金印刷

上海街近太子附近,傳至第三代的南美印刷是個喜帖尋寶地。老舊石招牌掩沒在加建的騎樓中間,地下散落剛印好的百家姓利是封,最搶眼是店內兩座70年代左右的西德印刷機,還在轟轟轟地操作着。若問店子開業年份,第二代老闆徐伯只餘零碎記憶:「呢度起好我哋就開喇!」上海街建成於1887年,咪成126年?徐伯:「唏,你問到我咯!」說畢,拿起飯碗就扒,以為他不理我,突然:「呀,掟菠蘿嗰陣吖!我哋仲走去睇㖭,仲有火燒九龍城,我哋都有去睇!」 50年火燒九龍城,67年暴動,徐伯由周街跑的細路到接手喜帖店,今日七十多歲了。店子初時主要印利是封、月曆及喜帖,由先用黃墨再掃上金粉的掃金印刷,到用金墨直接印上去的印金,然後變成三四十年前引入當時最先進的西德印刷機進行燙金印刷,走上了事業的高峯。徐伯講起就笑:「吖,左轉右轉,呢啲(印金)又歡喜嗰啲(燙金)又歡喜,(客人)都亂晒龍。差唔多(可以講)燙金係我哋設計,嗰時梗係好,無人孖你爭生意。當時生意好靜㗎,但唔使做好多,好利潤吖嘛。不過新年多嘢做時,可以由(早上)八點做到(凌晨)三、四點。」
找徐伯印喜帖,一百張起$350,一星期起貨,仍有零星客人來挑選傳統的設計,個個跟徐伯兩父子傾得兩嘴,顯然是老主顧,「無㗎啦呢行,你睇附近啲舖都執晒,利東街仲無晒㖭,𠵱家都式微啦,有大陸嘅帖我哋仲邊有得做。」70年代前後,上海街是油尖旺的旺地,有許多裙褂店、風水店,現在則變了裝修街。没落工業,循例都來矯情一番,失落嗎?徐伯:「我都七老八十,成八張咯,仲做?做嚟都係精神寄託,唔係搵錢㗎啦,人哋投資股票,一陣都唔知搵幾多啦,做呢啲邊搵到錢。」

南美印刷

地址:太子上海街722號地下
電話:2381 2630

今時今日雷射切割

「最初的喜帖,其實只得一張紅紙,老人家用毛筆寫上何年何月何人要婚宴嫁娶,就係咁。」在灣仔扎根60年,高峯期曾在成行成市的喜帖街(利東街)有三家分店的H2 Cards,很早引入西式喜帖,在三藩市又有合伙公司,當年已是業中最新最潮的一群。95年喜帖街各散東西,店東或退休或結業,H2仍在鄰近的大王東街繼續印印印。今日,人們對喜帖的要求高了,新人覺得那是個性品味的象徵,H2總經理Kateria:「個個嚟到都話要整張特別的、獨一無二的喜帖,我哋就同佢哋傾,或者一齊討論。𠵱家差不多八成客人都要新的設計,唔似以前淨係睇辦訂印,好個人化的。」近年流行Laser Cut,即是以用來燒鐵的雷射切割去做精細圖案雕刻,效果細緻又靚,完成一張需時一分鐘,較花時間,價錢也較貴,還可加上裝飾如水晶、流蘇、蕾絲、蝴蝶結等,甚至可製成豪華禮盒,成份聖旨一樣送出去,夠晒Gimmick。

H2 Cards

地址:灣仔大王東街G12A
電話:2542 2880
網頁: http://h2cards.com.hk

新派喜帖玩自作業

60年代派帖,得全家總動員人手送出。在南丫島做喜帖設計的Joanne和Cherry懷念這情懷,所以他們的部份手作設計都向大件頭發展,Size大得非要由新人親手送上門給親朋戚友不可,Cherry:「因為我們相信邀請的過程比張卡本身更重要,卡只是一個工具,當然個工具越勁,邀請嘅過程就越厲害。」於是,他們為在沙灘舉辦的婚宴設計了玻璃樽喜帖,真係成個鏗鏗聲的玻璃樽送出,想託人代送都難;還有寓意乾柴烈火的火柴盒喜帖,不過個火柴盒要自己摺,拿出來夠「掗拃」已起先聲奪人之效;還有揼了幾個入境印,有好多頁可以寫上心聲或宣揚「禮金請捐慈善基金」的Passport喜帖,都非常有心思,能起一見炸彈即笑的奇效。二人的網頁現已有約30多個基本喜帖設計,收費比外面的貴一點,但夠獨特,Joanna:「我們屬少量製作,且工序都在香港進行,如果選購我們原有的設計,所需時間還比較快,想跟我們商量新的概念或設計,最好預留三個月時間吧。」網頁還有一部份,專教新人們自製喜帖,留個獨特的印象給賓客,有需要不妨參考。

983Wedding.com

電話:2832 7997
網址: http://www.983wedding.com.hk

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載