› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

為陶瓷打 死煲呔

男人衣着可浮誇的地方不多,煲呔是其一。黎青龍醫生打扮靚絕醫學界,愛三件頭西裝襯Sharp醒煲呔,家中煲呔收藏過百。另一邊廂,替城中名媛設計晚裝的何國鉦認為穿衣最忌太過斯文,於是設計出比女人華衣更浮誇的羽毛、珠片、閃石煲呔。

記者:周燕 

攝影:潘志恆 

場地:Chez Patrick 

部份圖片由受訪者提供

打呔打足二十年

港大內科及肝臟科講座教授黎青龍予人兩個印象,一是跟他姊姊即前朝高官余黎青萍餅印一樣,二是頸上那個金色陶瓷煲呔太耀目,再加上青草色三件頭西裝,令這個65歲肝臟權威,走在路上,型到飛起。
你笑他靚過龍,他卻說:「邊個唔貪靚?我1992年開始打煲呔,現在有百多條,即是平均一年買六條。一年六條,唔係好多啫。」每日面對百幾條煲呔,應該幾頭痕吧?「梗唔係啦,多顏色先易襯衫,少選擇就話難揀啫。」他說醫生應該要打領呔,原因是:「斯文一啲,總之一入Ward就要戴,衣冠不整,病人唔喜歡。」這貪靚醫生不甘穿戴平凡見人,惟有換上比領呔更醒目的煲呔,「有人指出,領呔容易沾染病菌。」因為煲呔形象太深入民心,曾經有班醫學院學生在上課Last day齊齊戴煲呔,向教授來個幽默的致敬。
粉紅Hermès煲呔、英國藝術家Christina Gascoigne的七彩煲呔、Dunhill藍紅方格煲呔……看得人眼花撩亂。他很喜歡Christina Gascoigne的出品,信手拈來就是一個青草色煲呔,細看每道橫紋粗幼不一,顏色也深淺有別,原來是人手繪畫的,十分有心思;Christina Gascoigne是英國藝術家,擅長陶瓷創作和在絲上繪畫,煲呔是她其中一個創作系列;另一個湖水藍作品,雖然圖案簡單,但顏色深淺富層次。

不一樣的蝴蝶結

黎青龍有他的堅持:「有次喺英國Opera house,見到有人戴膠煲呔,幾核突!」雖然他穿衣花俏,但堅持打傳統「生煲呔」,即由一塊布綑出一個蝴蝶結來,橡筋加現成蝴蝶結的「死煲呔」,他最怕怕。親手打的蝴蝶結,每次總有點不一樣,這才是煲呔特別之處。
他唯一會打的死煲呔,是意大利品牌Cor Sine Labe Doli的陶瓷煲呔,因為煲呔本身就是一整塊已打好蝴蝶結的陶瓷,表面光滑亮麗,沒有結可以打。最近拿港大長期服務獎,65歲的他也戴這品牌的白陶瓷煲呔,襯橙色西裝、黃色襯衫,夠晒突出。「有次喺Harvey Nichols見到,覺得好特別。」原來這男士品牌以陶瓷作為主要創作物料而見稱,2009年才成立,已經成功以陶瓷煲呔突圍,最終被貪靚的教授看上眼。黎青龍一買,就買了六個,看上去雖然造型類近,但其實各有特色,蝴蝶結的摺紋不同,形態也有差別,他自信滿滿說:「每次戴,未見過有人話唔靚。」

衣着巡禮

僱傭兵打先

煲呔起源於17世紀歐洲,當時的克羅地亞僱傭兵以絲巾圍繞頸部固定襯衫領口,後來這做法被法國人採用,絲巾打法慢慢變成煲呔領結。

討厭官仔骨骨

「我個樣,一着西裝就顯得好斯文,其實我唔喜歡。我唔喜歡呢個形象,想擺脫呢個形象。」時裝設計師何國鉦向來做女裝,近年做起煲呔來,只為滿足自己,「一着西裝,我就似做文職工作,官仔骨骨,我唔喜歡,但出席Black-tie events又唔可以着得好Casual,於是就諗應該點打扮。」後來,他發現煲呔是男士恩物,「女人着衫可以好花枝招展,男人多數着西裝,但款式變化唔大,惟有喺配飾例如煲呔之上做啲變化。」
何國鉦有很多煲呔收藏,不論朋友Party還是隆重場合,總有一款合適,例如法國年輕品牌Alexis Mabille,釘上金色珠片,加上粉紅刺繡,花俏得很;另一款Lanvin花花圖案煲呔,一邊白花,一邊紅花,相映成趣;本地牌子Izzue的黑色煲呔,兩邊加上誇張窩釘,「煲呔其實喺人視線所及嘅位置,戴咗佢,可以點綴一身穿着。」

郭富城最佳示範

何國鉦認為身形瘦小一點的男士戴煲呔比較好看,「太高大或膊頭太橫嘅男人,煲呔戴上身之後,比例會縮細咗,唔好睇。煲呔之於男人,猶如珠寶之於女人,有氣質先戴得好睇。」論身形和氣質,他認為郭富城是戴煲呔最佳示範。
有感坊間煲呔始終太平實,他嘗試自己設計,Dorian Ho Homme Collection有推出煲呔,物料和款式都很誇張,放棄傳統老正的設計,用上羽毛、珠片、牛仔布等物料,刁鑽程度拍得上女裝。這天他穿上一套彩藍色西裝,襯上羽毛煲呔,隆重得體,又充滿新鮮感,整體感覺很醒目,難怪他說,一個別緻的煲呔,可以令到整個人的形象活潑起來。

何國鉦設計

何國鉦珍藏

(Dorian Ho Homme Collection查詢:2321 3288)

衣着巡禮

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載