蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年03月06日

小故事:神獸達人 拒絕典當廣東話

「我母語係廣東話我咪鍾意廣東話囉!歸根究柢咪就係香港人囉!就咁簡單!」早前教育局一度將廣東話定義為「一種不是法定語言的中國方言」,再次引起港人對粵、普之爭的關注。一幅《大粵港諺語》圖網上瘋傳,83個廣東諺語融入圖中「估你唔到」,圖畫傳到北美華人之手,大堆私訊湧至,要買要訂解鄉愁。他是曾畫神獸卡紅爆的高登仔阿塗(筆名),一直情迷廣東話,看不慣家長們寧跟小朋友講蹩腳的英文與普通話都不講廣東話。「感覺就好似見普通話較有經濟潛力,就舉咗(典當)廣東話嚟換,諗住隨時可以贖番。但到時,可能你畀多多錢都未必贖得番。」這根本是場意識形態的文化戰線。
記者:陳慧敏
攝影:黃子偉

「語言連繫族群。研究廣東話係自我探索嘅過程。透過語言你先知道自己係乜嘢人。」阿塗對廣東話的情,源自其家庭背景。爸爸講閩南話,媽媽是講廣東話的泰國華僑,對話中混雜泰文單字而不自知。小學時說:「我『側格呢』(胳肋底)好痕。」同學以為他在搞笑,他才發現自己的廣東話混有泰文。塗媽媽又講好多上一代俚語,如笑他拿住玩具好似「馬騮執到桔」,意指「都唔明你做乜咁開心!(又唔係執到蕉。)」;還有「賣魚佬洗身,冇晒腥氣(聲氣)」等。阿塗:「廣東話真係特別靈活,嗰啲俚語、歇後語都係嶺南地區文化的特色;九聲已經特別難學啦,又常玩食字,好似猜燈謎,一個音有多重意思,然後謎面同謎底都係俚語。兜個圈鬧人,輕鬆到肉又生鬼,呢啲係嚴肅嘅北方語系冇嘅。」

廣東話是條戰線

其實粵普之爭由來已久,直至2010年7月,廣州市政府提出電視台以普通話取代廣東話,觸發撐粵語遊行。阿塗後來畫了第一幅撐廣東話的《神獸漫話》:「當時真係覺得唇亡齒寒,殺到埋身㗎!情感上,我諗嘢、回憶都用廣東話;政治上,語言承載文化、價值觀同思考模式。嗰啲好共產、好官腔嘅普通話用語,個思維同香港體制、民主法治自由嘅文化好唔同。若果廣東話被淘汰,好多意識形態同核心價值都會失守。我覺得廣東話係一條戰線。」

別小看自己母語

教育局試水溫式的文章,2月1日被揭發, 翌日已急急道歉撤下。但真正讓阿塗覺得「殺到埋身」的,卻是香港人自己先放棄,撲向普教中文懷抱:「有啲家長寧願自己講住半鹹淡普通話同英文,都要小朋友喺屋企、學校都講英文同普通話,佢哋覺得自己喺度爭取新機會,其實係自己先棄械投降。」在他的眼裏,問題不是學不學多種語言,而是港人的自我文化認同。阿塗的妹妹早年沉迷台灣蘇打綠,拚命學國語;近年轉投韓星,連facebook status都變了韓文:「佢啲朋友、男友同阿哥都係香港人吖,點解生活上要轉嚟轉去?90年代香港文化產業好輝煌,韓國人都走嚟學廣東話,追四大天王追港星,𠵱家倒番轉。我喺佢身上睇到時代嘅變遷,好欷歔。以前我們嘅文化認同真係強好多。」網友質疑,死守廣東話,要見工要衝出世界都雞同鴨講,有用嗎?阿塗:「我唔反對家長畀小朋友學多啲外語,但就唔好睇小自己嘅母語,覺得佢低俗或者無用,誤導佢嘅地位同影響。咁樣香港嘅自我文化就會萎縮,永遠跟喺人後面,要復興軟實力或創意產業都好難了。」

粵語之首廣東話

其實在廣東省內除了包含廣東話、四邑話及化州話等各式方言的粵語外,還有包括潮州話、雷州話等的閩南語,但由於境內大部份人都聽得懂廣東話,致令廣東話成為粵語之首。

答案:九唔搭八

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載