› 選擇地區
三藩市
紐約
洛杉磯
其他美國地區
香港 台灣 北美
 
2016年04月24日

【文化籽】讓白雪公主成為美國隊長

如果真的有童話版復仇者聯盟,飾演白雪公主但被飛出續集的Kristen Stewart話唔定會化身美國隊長。
設計圖片

【文化籽:西遊記】
《美國隊長3:英雄內戰》(Captain America:Civil War)即將上畫,悶未?再整多套《變種特攻:天啟滅世戰》(X-Men:Apocalypse)。人多原來真係好辦事。《蝙蝠俠對超人:正義曙光》(Batman v Superman:Dawn of Justice)人見人踩,美國照樣收三億幾美金,香港照樣收六千萬港紙。唔到你唔屈服。白雪公主好應該搵埋灰姑娘同睡公主拍番一系列愛情動作片。

近幾年,流行將傳統童話改編成魔幻特技電影,票房好到令人驚訝。兩年前的《黑魔后:沉睡魔咒》(Maleficent),全球票房達到七億五千萬美金。口碑平平的《白雪公主之魔幻復仇記》(Snow White and the Huntsman),又收接近四億。難怪不是甚麼三部曲四部曲,一樣開拍續集《獵神:魔雪叛變》(The Huntsman:Winter's War)。
飾演白雪公主的Kristen Stewart,跟上一集導演搞出不倫戀,今集被飛走。雖然係現代版本啫,白雪公主始終要玉潔冰清。無咗白雪公主,《獵神》改行前傳及外傳路線。錯有錯着,扮演獵神的雷神Chris Hemsworth近年越來越紅,今次名正言順掛頭牌,電影公司更加開心。因為風格魔幻,在上集已死的皇后Charlize Theron,很合理便翻生。《魔雪奇緣》(Frozen)大熱,於是加多個擁有超能力的皇后妹妹,跟Elsa公主一樣,一舉手一投足可以弄出冰天雪地,服裝打扮,抄到十足。再補多一段獵神七年前的愛情生活,跟青梅竹馬女朋友因誤會而分開,一再遇,舊情即時復熾。炒埋炒埋,就一碟。
劇情當然兒戲到極。奸角永遠唔肯煮死正義主角,閒角又一定誓死追隨弱勢主角,貪錢的會突然不再貪錢會突然重情重義。如果法庭是這樣,如果《明報》是這樣,如果現實是這樣,多好。童話嘛,唔係咁樣,唔通講到有特權的貴族可以日日玩死平民百姓,絕對不會受到法律制裁,仲會有人幫手大力護航:「利用特權一兩次就算濫權?你知唔知甚麼叫做濫呀?」咁寫實,就不是童話,是紀錄片。
樂觀一點,在兒戲中找尋別出心裁。舉個例,劇情講邪惡皇后個天真妹妹本來只係普通女仔,被有婦之夫溝去,肚都大埋,仍然盲目等待對方,跟你很喜歡她而她很不喜歡你的那一個,很相似。點知,俾個家姐靠害,誤會個私生女俾男朋友燒死,火速魔性大發,唔聽解釋毫無惻隱諗都唔諗,便殺死一直耿耿於懷的最愛。不特止,仲要拆散其他無辜街坊的幸福家庭,要小朋友硬生生跟父母分離。你由迷信愛情,變成背棄愛情,於是,見到有人排期結婚,忍唔住出手破壞,還說得通。自己失去骨肉,於是搶走別人的骨肉,基於吃不到的葡萄是酸的,也合情合理。現在卻是拐帶小朋友因為想解放小朋友,殺你老竇老母因為重視親情終極會害人難過。世界上真係有咁多丁蟹?連好遠好遠的地方都有?本來就很牽強,不過,去到電影中段,丁蟹妹一個唔小心從魔鏡把姐姐復活,即時黑都面晒,甚至流露出對自己衰多口的自責,我又真心佩服童話故事都如此寫實。尤其,姐姐好寸咁擺個大姐款,老馮般要做開大佬的妹妹企埋一邊,妹妹既驚訝又憤怒又無奈,真係將人性陰暗面表露無遺。來到結局,好姊妹終於自傷殘殺,你簡直覺得像魚柳飽有魚柳一樣正常。兜了個大圈,話番畀你知,親人真係唔親,原來真係愛人最親。你亦吹佢唔脹。
本來是無綫劇的老土設定,竟然拍出一股亞視獨有的怪味。到以為是亞視出品,但服裝化妝美術設計,又明明比無綫製作更亮麗。你仲想點?我只埋怨電影公司不夠野心。玩大啲嘛,整一個童話版復仇者聯盟,白雪公主聯埋灰姑娘加醜小鴨搭上睡公主與賣火柴的女孩,齊齊硬拼三隻小豬入面隻狼。去到第二集,可以講到白雪公主有中年危機,於是研製出毒性極強的蘋果,打算用來保衞世界,點知失控,反而危害全球安危。再拍下去,第三集,一定係白雪公主與醜小鴨為爭仔而反目成仇,互相吹雞拖馬。張海報,左手邊會係格林童話系,右手邊就係安徒生派,八至九條女,鬥睥。成績好,可以拍前傳,拍外傳;玩時空穿梭,老去的角色又話咁易變後生;巫婆呀狼呀灰姑娘啲家姐後母呀,組成奸角小隊;三隻小豬各自成為一套電影的主角;再拍埋電視劇,集合四套電視劇又夠料串成另一套電視劇。真係想想都興奮。你以為無可能發生?在只需要少少共通點就可以結合組隊的年代,連亞視都會在無綫重生,就算麥當勞有朝一日賣埋家鄉雞,也不覺得奇怪。奇怪得過,新組織香港眾志聯乘新組織香港列陣,變成另一支新組織眾志列陣?

撰文:方俊傑

觀塘長大,壹仔打滾,偏愛西片、西劇、中日韓美女。利物浦悲慘球迷,非西人一個。facebook專頁:方俊傑

編輯:謝慧珊
美術:黃創泰

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載