› 選擇地區
三藩市
紐約
洛杉磯
其他美國地區
香港 台灣 北美
 
2016年07月15日

【文化籽】總有種女人 天生要被圍觀要被膜拜

Taylor Swift是天王巨星,只需要被圍觀被膜拜,她需要的是粉絲,不一定想要真愛。

【文化籽:西遊記】
美國天后Taylor Swift被偷拍到跟「邪神洛基」在石灘約會,懶理途人目光,照樣親密。事件曝光後,Taylor Swift與本來的男友Calvin Harris立即齊刪合照。非官方統計,走紅八年內,Taylor Swift先後有十一個男朋友,剛剛足夠人數組一支男朋友足球隊,只欠幾員後備。

「邪神洛基」Tom Hiddleston最被香港人認識,當然在《雷神奇俠》(Thor)飾演雷神奸鬼細佬Loki,之後在劇集《夜班經理》(The Night Manager)的演出大獲好評,即將在香港上畫的《魔天豪廷》(High-Rise),賣點更在Tom Hiddleston全裸。有名有姓,再稱呼他為邪神似乎有點怠懶。
都無辦法,鬼叫佢媾的是超級食仔王Taylor Swift,女尊男卑格局立即浮現。不是說事業成就、唱片銷量、賺錢能力之類,而是講公開過的情人名單,足夠叫一眾男生趨之若鶩。只拿較具知名度的來介紹:2009年,嗒了剛拍過《吸血新世紀》(Twilight)的人狼Taylor Lautner。呢件小鮮肉,當年等於唐僧肉,人人得而吃之。2010年,跟《斷背山》(Brokeback Mountain)的Jake Gyllenhaal撻着又分手,男方想復合,女方整首大熱金曲《We Are Never Ever Getting Back Together》來叫對方食蕉。2012年,跟天王級食女王歌手John Mayer一齊,玩完後,John Mayer媾到Katy Perry。都仲未計「One Direction」成員Harry Styles,與甘迺迪家族後人Conor Kennedy又拍過三個月拖。Taylor Swift張清單,不單只夠密集,含金量也極重。
好了,未有邪神出現之前,據說正印是名DJ Calvin Harris。呢位先生看來不是玩玩吓,對於戴了綠帽,完全放唔低。據稱Calvin早知女友偷食,苦苦相勸挽救感情,但女食家好明顯毫無留戀,只想貪新厭舊。放不低的Calvin Harris打算寫首歌唱衰Taylor Swift。不特止,嫌自己唔夠力量,仲想搵埋Taylor Swift宿敵Kanye West一齊出招。Kanye West曾在頒獎禮講明Taylor Swift唔夠班,又試過拍MV搵替身露點扮Taylor Swift瞓喺自己張床,因為歌詞話:「我可以隨時搞Taylor Swift,因為係我捧紅佢。」兩大仇家聯手出招,可以預期殺傷力和毒舌程度將會衝出外太空。
有乜用吖?你覺得Taylor Swift會內疚到流淚?會因為傷害了一個好人而慚愧?有種女人,根本不會受其他評論影響,對禮義廉恥完全絕緣。否則,點會講得出話每次有新男友,只係為咗刺激創作靈感,用完便要即棄。今次,真係可以講句:「認真,你便輸了!」點吹得佢脹呢?生得靚,還後生,即使歷史往績好恐怖,依然會有無數男人前仆後繼湧過來。最緊要係賺錢多,2015年,收入一億六千萬美金,明星之最,真係無儍仔再敢衝個頭埋去,用錢買都仲買到。有事業、有才華、有信心,根本天下無敵到令普世妒忌的高度,佢喜歡點玩就點玩。
然後,你可能會問:「佢咁賤,冇可能會搵到真愛喎?」咪儍啦,首先,賤與真愛,不是反比關係,愈賤愈沒真愛,我甚至認為有少少正比,愈賤愈容易出真愛,係睇吓當事人珍唔珍惜啫。更深層的問題是:Taylor Swift幾時話過要擁有真愛啫?她是天王巨星,只需要被圍觀被膜拜,她需要的是粉絲,較有名氣較靚仔的,就可以上上床行行街咀兩咀。做人,不要假設其他人跟自己一樣,你想生兒育女平淡生活,莫講話其他人未必想,你老公或你老婆都未必想。人各有志,你總要接受世事不能盡合你意。

撰文:方俊傑

觀塘長大,壹仔打滾,偏愛西片、西劇、中日韓美女。利物浦悲慘球迷,非西人一個。facebook專頁:方俊傑

編輯:李寶筠
美術:利英豪

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載