› 選擇地區
三藩市
紐約
洛杉磯
其他美國地區
香港 台灣 北美
 
2017年02月18日

【親子籽】兩歲半揸刀 四歲識炒飯 自家教學媽媽:從玩樂中學習

【親子籽:教養之道】
主流教育制度常為人詬病,過量作業操練致學生壓力爆煲,填鴨式教育更扼殺學生創意及學習意欲。其實主流學校以外,孩子還有甚麼選擇?有現代孟母三遷,亦有家長決意逆流走上自家教學路。註冊社工謝麗敏(阿敏)半年前開設facebook專頁「社工爸媽自家教手記」,分享她摒棄主流幼稚園,在家陪伴兒子成長的心路歷程。

相關新聞:【親子籽】香港都有非主流學校 主張慢學

周日午後的北區公園兒童遊樂場,由和煦陽光和孩童嬉笑聲交織而成。如果你是該處常客,可能曾碰見一名髮尾自然鬈曲的活潑男孩,總有媽媽在旁守候。他們正是自家教媽媽謝麗敏(阿敏)和兒子天天。阿敏說到北區公園玩耍是天天最愛的活動之一,「我哋最主要嘅大方向係做家務,有大自然活動、身體活動,戶外同室內活動要平衡。有時做藝術活動,例如畫水彩畫、做手工、做紙黏土,或者開包過期麵粉喺地下,佢鍾意free play(自由遊樂)點都得。」

為子放慢節奏 工作狂「有番人生」 

從事青少年及兒童服務已有16年的阿敏,見盡各式各樣的中小學生,因受主流學校教育模式所限,早已失去擁抱夢想的能力,「你問佢夢想真係會答唔到你,因為佢哋好多時都被培養成唔可以有自己諗法。佢哋要適應環境,睇老師同睇家長要求,連玩都冇機會自主,慢慢失去機會去諗自己想做乜嘅能力。」直到兒子天天一歲半,阿敏經朋友介紹參加了華德福遊戲小組(Playgroup),隨後再接觸不同類型的非主流教學工作坊,始發現截然不同的教學方式,「好人性化,以小朋友嘅需要為主導,非以管理、秩序或者跟大人期望去做,呢個同我以前咁多年學嘅做嘅都好唔同。」
阿敏的自家教學方式,聽起來似乎只有玩、玩和玩,不教兒子寫字、讀書、計數嗎?阿敏表示,兒子未滿7歲換牙前,盡量不想刻意傳授學術知識,讓他先從生活及玩樂中學習自理,培養好奇心和創造力,「日常生活中我希望盡量畀佢玩真嘢,譬如佢兩歲半已開始揸真刀切嘢,4歲識入廚炒飯,所以佢唔玩煮飯仔,因為佢已經玩緊真實世界嘅嘢。」自家教學需由爸爸或媽媽全天候照顧孩子,要好有錢先做得到?阿敏說這是很多人的誤解。丈夫與她同樣是基層家庭出身,社工的收入亦不算多,另有老人家要照顧,不可能完全靠丈夫的全職收入。幸而阿敏有多年社工經驗,可找到相關兼職幫補家計,近來更嘗試發展新路向,開班教授製作手工皂,「我哋係冇家底嘅人,我哋都為理想努力,所以好多人問自家教學到幾時,其實由天天3歲到呢家都答唔到,我都成日話睇吓啲兼職點、睇吓經濟情況點,如果有一日去到支撐唔到就讀番主流,但係個迫於無奈嘅選擇。」
過去17年社工生涯,阿敏多使用主流方法教導學生,例如會開小組帶領學生進行軍訓、夜行等訓練。為了讓學生突破自己、克服困難,阿敏坦言會盡量逼學生達到課程或活動設計的目標,忽略了學生的意願,「我𠵱家都唔太贊成咁做。我會畀佢哋有free play、有空間,以前唔會畀,原來自由玩耍畀佢哋學習到好多嘢,例如社交、專注力、創造力,令佢哋情緒平靜、發揮自主,𠵱家教法嘅設計會好唔同。」除工作上對待學生的方法有所改變外,她發現自己為了配合兒子慢學的節奏,從一個處事急躁、講求效率的工作狂,變成了懂得放慢腳步、享受空間的人,「我陀住佢7個月時都仲帶隊露營,只不過唔過夜咁解,做嘢同好多香港人一樣,好忽略自己所有需要,身體、情緒、精神、心靈健康,我個仔將呢啲嘢全部送番畀我,我覺得自己有番個人生。」

「重點係搵一條最想行嘅路」

然而,並非太多人支持他們自家教學的決定。訪問當日,任職主流幼稚園逾30年的退休教師陸結韶,問出了很多人對自家教學的疑問,「主流幼稚園只得三個鐘,放學返到屋企都大把時間自家教,而小朋友返學又可以過群體生活,點解你唔畀佢返呢?」阿敏回答,返學時數非重點,只因她不算十分認同主流教育模式,例如7歲前教導孩子學術知識、常用刺激性方式如誇張語調和孩童溝通等,並非阿敏理想的教育方式。陸老師亦疑惑,會否擔心天天有朝一日投身社會,會銜接不到?阿敏表示非主流學生的入大學比率其實比主流學生高,但能否入大學並非她最關注的事,「重點係佢搵到自己一條發揮得到、最有熱情、最想行嘅路。錢搵到最好,如果搵唔到但生活到,做緊自己鍾意嘅事,人生過得快樂、健康,就已經好夠。」
兒子天天現已5歲半,即將適齡升讀小一,阿敏說撇除經濟因素,她的夢想是讓天天可一半時間返私校,一半時間遊學或以自家教方式,繼續教他探索世界,「前幾日佢同我講佢有四個夢想,第一係爸爸唔使返全職成日陪住我,第二係媽咪繼續陪住我,第三係返到自己鍾意嘅學校,第四係長大後做發明家發明好多嘢。」而她和丈夫的另一個夢想,是開設一間free play中心,「以天然為主題,室內係天然玩具,室外有大花園種植農作物,有沙池、有鞦韆、pizza爐、木工室等,類似青少年中心,但內容完全唔同,接待家長同孩子,等佢哋經歷主流中嘅甘泉。」

fb:社工爸媽自家教手記

記者:封愷瑜
攝影:黃子偉
編輯:謝慧珊
美術:楊永昌

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載