› 選擇地區
三藩市
紐約
洛杉磯
其他美國地區
香港 台灣 北美
 
2003年05月08日

高檔日式餐廳改包裝$10拉麵落番重料

■負責人李邦話現在嘅飲食已經無萬世基業,不斷創新兼靈活變通才是做生意嘅金科玉律。

最近花園街一間老字號嘅日本料理餐廳,捨棄了多年行高格調路線的形象,大刀闊斧以平民化日本食品作招徠,店內大部份拉麵都係10蚊,大大碗,包飽肚!

記者:何善華
攝影:周旭文

呢排去到旺角、銅鑼灣一帶,都會見到好多平到笑嘅食店,好似20蚊碟小菜、一蚊一隻雞負責人李邦表示將食店嘅形象徹底改變,背後花了不少心機去說服股東和業主。「雖然10蚊一碗拉麵唔係賺到好多錢,但總好過無人流,薄利多銷始終係最實際。」兩個月前在一班股東勉強支持下,平價日本美食終於面世!皇天不負有心人,李邦話𠵱家每個月都有錢賺,重比以前賺多一成!

由幾間分店退守至此
今年44歲嘅李邦話呢間食店自開張以來,喺旺角已經有九年歷史,是當時旺角區首間經歷日本料理的食店,走高格調路線。
「以前門口有塊落地大玻璃、店內嘅酒吧枱係高級雲石,高峯期每日賺約3萬蚊,但近幾年生意下滑,由幾間分店打回原形,𠵱家全部生意集中喺旺角。所以孤注一擲,將門口改成開放式,親民一啲嘛!」

湯底用番九州原味
店外的海報註明「由朝拉到晚.10蚊拉麵任揀」,吸引不少途人駐步留意,採訪期間亦有不少客人出出入入,「薄利多銷」果然有其箇中道理。李邦話雖然𠵱家餐廳以平價作招徠,但食物材料同工夫絕對沒有偷減,湯底依舊用上九州湯底,童叟無欺。此外,李邦更創製出數款日本小食,各有特色之餘亦不花巧,都係以平價為主。記者亦忍不住試試吉田嘅10蚊拉麵,發覺十一款中的其中五碗拉麵最抵食,值得向讀者推介。

防炎絕招!
問到食店有沒有加強衞生,李邦不諱言表示日本食品一向注重清潔衞生,除了規定員工要佩戴口罩外,店內亦不時消毒清潔,令顧客食得安心又放心。

和風牛腩拉麵
男士喜歡大大啖食牛腩,女士們則愛牛腩的肥肉隔開,但吉田嘅和風牛腩肥瘦參半,口味自然更大眾化。

五香牛𦟌拉麵
一咬塊牛𦟌就覺得牛筋油與牛肉互滲的混合口感,此時再夾麵食,帶有五香味的湯底令麵條變得更易入口。

鮮牛肉拉麵
一食落口就知牛肉唔係平價貨,牛肉絲幼嫩易入口,肥瘦肉均勻,鮮牛肉配搭九州湯底,是小記最鍾意一款。

辣肉拉麵
小記一向唔鍾意食辣,以為經過湯底中和辣肉的鮮辣味會容易入口,但辣肉嘅辣味依然未散,是嗜辣者必選!

餃子拉麵
經烤煎的餃子放進湯底後,減少油膩感,但餃子表層依舊保持鬆脆可口,最難得的是餃子內依然保留着肉汁。

其他抵食推介
雜錦海鮮火鍋定食套餐 $38
出面食日本火鍋定食至少都要50蚊埋單,但吉田嘅特價鍋物平之餘重包埋小食、白飯同味噌湯,試過都覺得同其他貴價日本餐廳沒有太大分別。材料十足,慢慢食起碼要半個鐘頭。負責人李邦話呢款火鍋定食係食店最熱賣的套餐。

雜錦刺身套餐$58
任揀四款心水選擇
吉田重有唔少由李生親自炮製的日本小食,例如9蚊有4件嘅炸春卷或兩隻炸蟹箝,但小記較鍾情於雜錦刺身套餐,套餐包括任選4款刺身,可配飯、麵或烏冬,兼另送冷飲一杯,亦都只係$58,完全打破「平嘢無好嘢」的舊有觀念!

吉田日本茶餐廳
地址:旺角花園街1號
電話:23322103
營業時間:10:00am-12:00mn

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載